مقبوضہ کشمیر،میر واعظ کو مسلسل تیسرے جمعہ کو بھی گھر میں نظر بند

قابض حکام اپنی خواہش اور مرضی سے انہیں گھر میں بند کرکے مذہبی فرائض کی ادائیگی سے روکتے ہیں

جمعہ 26 ستمبر 2025 14:45

سرینگر(اُردو پوائنٹ اخبارتازہ ترین - این این آئی۔ 26 ستمبر2025ء)غیر قانونی طور پر بھارت کے زیر قبضہ جموں و کشمیر میں قابض انتظامیہ نے کل جماعتی حریت کانفرنس کے سینئر رہنما میر واعظ عمر فاروق کو تیسرے جمعہ کو بھی تاریخی جامع مسجد سرینگر میں نماز جمع اداکرنے سے روکنے کیلئے مسلسل گھر میں نظربند رکھا ۔کشمیر میڈیا سروس کے مطابق لیفٹیننٹ گورنر منوج سنہا کی زیرقیادت قابض انتظامیہ نے سرینگر میں میر واعظ کی رہائش گاہ کی طرف جانے والے تمام راستوںکی ناکہ بندی کر دی ۔

ادھر میرواعظ عمر فاروق نے ایکس پر ایک بیان میں کہا ہے کہ پولیس کی طرف سے انہیں مطلع کیاگیاہے کہ انہیں مسلسل تیسرے جمعہ بھی گھر میں نظربند کردیاگیا ہے اور جامع مسجد سرینگر جانے کی اجازت نہیں ہے ۔

(جاری ہے)

انہوں نے کہاکہ ایسی پابندیاں بنیادی حقوق پر حملہ ہیں جن کے ذریعے عبادت کو بھی جرم بنادیاگیاہے ۔انہوں نے کہاکہ قابض انتظامیہ ان کی آزادی کے بارے میں فیصلہ کرتی ہے ۔قابض حکام اپنی خواہش اور مرضی سے انہیں گھر میں بند کرکے مذہبی فرائض کی ادائیگی سے روکتے ہیں۔انہوں نے کہاکہ اس آمرانہ رویے کے لیے کوئی جوابدہ نہیں۔انہوں نے بار بار عائد کی جانیوالی پابندیوں اور قابض حکام کی طرف سے انسانی حقوق کی خلاف ورزیوں اور عوام کے جذبات کی توہین کی شدید مذمت کی ۔