امریکی صدر کا یکم اکتوبر سے مخصوص درآمدی مصنوعات پر نئے ٹیرف عائد کرنے کا فیصلہ

ان مصنوعات کی بڑے پیمانے پر درآمد امریکہ کے لیے غیر منصفانہ ہے لہذا قومی سلامتی اور دیگر وجوہات کی بنا پر مینوفیکچرنگ کے عمل کا تحفظ ضروری ہے؛ صدر ٹرمپ کا بیان

ساجد علی جمعہ 26 ستمبر 2025 15:59

امریکی صدر کا یکم اکتوبر سے مخصوص درآمدی مصنوعات پر نئے ٹیرف عائد ..

واشنگٹن ( اُردو پوائنٹ اخبارتازہ ترین۔ 26 ستمبر2025ء ) امریکی صدر ڈونلڈ ٹرمپ نے اعلان کیا ہے کہ یکم اکتوبر سے دنیا بھر کے مختلف ممالک سے مخصوص مصنوعات کی درآمد پر نئے ٹیرف عائد کیے جائیں گے جو وسیع پیمانے پر عائد کردہ محصولات کے علاوہ ہوں گے۔ عالمی میڈیا کے مطابق اپنے ایک بیان میں انہوں نے کہا کہ یکم اکتوبر سے ہم کسی بھی برانڈڈ یا پیٹنٹ شدہ دواساز مصنوعات پر 100 فیصد ٹیرف عائد کریں گے، جب تک کہ متعلقہ کمپنی امریکہ میں اپنی دواسازی کی فیکٹری تعمیر نہ کر رہی ہو، اس کے علاوہ ہم یکم اکتوبر سے کچن کیبنٹس، باتھ روم وینٹیز اور متعلقہ مصنوعات پر 50 فیصد ٹیرف عائد کریں گے جب کہ گدے دار فرنیچر پر 30 فیصد ٹیرف وصول کیا جائے گا۔

امریکی صدر کا کہنا ہے کہ ان مصنوعات کی بڑے پیمانے پر درآمد امریکہ کے لیے غیر منصفانہ ہے لہذا قومی سلامتی اور دیگر وجوہات کی بنا پر مینوفیکچرنگ کے عمل کا تحفظ ضروری ہے، یکم اکتوبر سے امریکہ کے باہر تیار ہونے والے بھاری ٹرکوں پر بھی 25 فیصد ٹیرف عائد کیا جائے گا، ہمیں اپنے ٹرکرز کو مالی طور پر مضبوط اور مستحکم رکھنا ہے کیوں کہ یہ قومی سلامتی سمیت کئی وجوہات کے لیے نہایت اہم ہے۔

(جاری ہے)

بتایا جارہا ہے کہ امریکہ کی جانب سے نئے ٹیرف کی وجہ سے بھارت کی مشکلات بڑھ چکی ہیں کیوں کہ بھارت دنیا کے سب سے بڑے دواسازی برآمد کنندگان میں شامل ہے اور امریکہ میں استعمال ہونے والی ایک تہائی سے زائد ادویات بھارت برآمد کرتا ہے اور بھارت کی طرف سے ہر سال تقریباً 10 ارب ڈالر کی فارماسیوٹیکل مصنوعات امریکہ کو برآمد کی جاتی ہیں۔