خیبرپختونخوا میں دہشتگردوں کو ادائیگی کیلئے کرپٹوکرنسی کے استعمال کا انکشاف

ہفتہ 27 ستمبر 2025 21:45

پشاور(اُردو پوائنٹ اخبارتازہ ترین - این این آئی۔ 27 ستمبر2025ء)خیبرپختونخوا میں دہشتگردوں کو ادائیگی کیلئے کرپٹوکرنسی کے استعمال کا انکشاف ہوا ہے۔چمکنی دھماکے سے متعلق محکمہ انسداد دہشت گردی کی رپورٹ کے مطابق مذہبی شخصیت پر حملے میں ملزمان کو کرپٹوکرنسی میں ادائیگی کی گئی، دہشتگردی میں ملوث داعش کا بڑا نیٹ ورک گزشتہ ماہ پکڑا گیا۔نجی ٹی وی رپورٹ کے مطابق غیرملکی خودکش حملہ آور کے سہولت کاروں کو کرپٹو کرنسی بھیجی گئی، کرپٹو کرنسی ای والٹ کے ذریعے افغانستان سے کوئٹہ بھیجی گئی، کوئٹہ میں کرپٹو کرنسی کو پاکستانی روپے میں تبدیل کرکے رقم لاہوراور کرک بھیجی گئی، دہشتگردوں کے سہولت کار اور ہینڈلرز پشاور، کرک، کوئٹہ، ضلع خیبر اور کوہاٹ میں موجود تھے۔

11 مئی کو 22 سال کے غیرملکی خودکش حملہ آور عمران گولیف نے روکے جانے پر پولیس موبائل وین پرخودکش حملہ کیا تھا۔

(جاری ہے)

رپورٹ کے مطابق خودکش حملہ آور کا ہدف ایک اہم سیاسی مذہبی شخصیت تھی، خودکش حملہ آور گزشتہ سال 24 اپریل کو نجی پرواز سے اسلام آباد ائیرپورٹ پہنچا اور اس نے دو دن اسلام آباد میں قیام کیا جبکہ وہ لاہور میں بھی دو روز رہا۔ رپورٹ کے مطابق غیرملکی حملہ آور کے چار ساتھی بھی پاکستان آئے ہیں جن کی تلاش جاری ہے، نیٹ ورک کے سات دہشتگردوں کو گرفتار کیا گیا ہے۔