بلاول بھٹو زرداری کا شہید بے نظیر آباد کے گاؤں پٴْنھل چانڈیو کے 16 بہادر جیالوں کو خراجِ عقیدت

ہمارے جیالوں نے اپنا لہو دے کر ملک کی جمہوری بقا کی قیمت ادا کی، اٴْن کی قربانی جبر کے خلاف جدوجہد کی تاریخ کا ایک امر باب ہے، بیان

اتوار 28 ستمبر 2025 16:05

کراچی/اسلام آباد/لاہور(اُردو پوائنٹ اخبارتازہ ترین - این این آئی۔ 28 ستمبر2025ء)پاکستان پیپلز پارٹی کے چیئرمین بلاول بھٹو زرداری نے ضلع شہید بے نظیر آباد کے گاؤں پٴْنھل چانڈیو کے 16 بہادر جیالوں کو خراجِ عقیدت پیش کیا ہے، جنہیں جنرل ضیاء کے دورِ آمریت میں 29 ستمبر 1983 کو تحریک بحالی جمہوریت (ایم آر ڈی) کے دوران بے رحمی سے شہید کیا تھا،ہمارے جیالوں نے اپنا لہو دے کر ملک کی جمہوری بقا کی قیمت ادا کی، اٴْن کی قربانی جبر کے خلاف جدوجہد کی تاریخ کا ایک امر باب ہے۔

میڈیا سیل بلاول ہاؤس سے جاری کردہ پریس رلیز کے مطابق پی پی پی چیئرمین نے اپنے پیغام میں کہا کہ شہید ٹھارو چانڈیو، شہید رجب علی چانڈیو، شہید علی شیر چانڈیو، شہید غلام مصطفی چانڈیو، شہید پیر بخش چانڈیو، شہید عٴْرس چانڈیو، شہید صدیق چانڈیو، شہید گلاب چانڈیو، شہید ہاشم خاصخیلی، شہید جانب خاصخیلی، شہید میرو خاصخیلی، شہید علی گل خاصخیلی، شہید محمد رمضان خاصخیلی، شہید محبوب علی سولنگی، شہید اللہ رکھیو سولنگی اور شہید حسین بخش منگنہار کے نام ہماری جدوجہد کی تاریخ میں سنہری حروف سے لکھے ہیں۔

(جاری ہے)

چیئرمین بلاول بھٹو زرداری نے کہا کہ پیپلز پارٹی ان ہیروز کو کبھی فراموش نہیں کرے گی جنہوں نے بدترین جبر کے باوجود آمریت کے خلاف جراًت اور مزاحمت کا راستہ اختیار کیا۔ انہوں نے کہا کہ ایم آر ڈی کے شہداء سے یہ عہد کرتے ہیں کہ اٴْن کا لہو کبھی رائیگاں نہیں جائے گا۔ ہم ہر قسم کی آمریت کا مقابلہ کریں گے اور قائدِ عوام شہید ذوالفقار علی بھٹو اور شہید محترمہ بینظیر بھٹو کے اس وڑن کو زندہ رکھیں گے، جس کے لئے بے شمار جیالوں نے اپنی جانوں کا نذرانہ پیش کیا۔ چیئرمین بلاول بھٹو زرداری نے پنھل چانڈیو گاؤں کے شہداء کے لئے دعا کی کہ اللہ تعالیٰ اٴْنہیں جنت الفردوس میں اعلیٰ مقام عطا فرمائے اور ان کے اہلِ خانہ کو صبر و ہمت دے، جو آج بھی جرات کی زندہ علامت ہیں۔