لہہ ایپکس باڈی کا بھارتی حکومت کے ساتھ مذاکرات سے دستبردارہونے کا اعلان

منگل 30 ستمبر 2025 00:00

سرینگر (اُردو پوائنٹ اخبارتازہ ترین - اے پی پی۔ 30 ستمبر2025ء) غیرقانونی طورپر بھارت کے زیر قبضہ جموں وکشمیرمیں لہہ اپیکس باڈی نے بھارتی حکومت کے ساتھ نئی دہلی میں 6اکتوبر کو ہونے والے مذاکرات سے دستبرداری کا اعلان کیاہے۔کشمیر میڈیا سروس کے مطابق ایپکس باڈی نے یہ فیصلہ لہہ میں حالیہ مظاہروں کے دوران 4 افرادکی ہلاکت اور 50سے زائد زخمی ہونے کے بعد کیا ہے ۔

ایپکس باڈی کے سینئر رکن تھوپستان چھیوانگ نے سرینگر میں ایک پریس کانفرنس کے دوران کہا کہ ہم نے متفقہ طور پر فیصلہ کیا ہے کہ جب تک ہمارے مطالبات پورے نہیں کئے جاتے اس وقت تک حکومت سے کوئی بات چیت نہیں کی جائے گی ۔انہوںنے لہہ میں24ستمبر کومظاہرین پر طاقت کے وحشیانہ استعمال کی عدالتی انکوائری اورماحولیاتی کارکن سونم وانگچک سمیت گرفتار افراد کے خلاف مقدمات کی واپسی کا اپنا مطالبہ دہرایا ۔

(جاری ہے)

چیوانگ نے کہا کہ کوئی بھی بات چیت شروع ہونے سے پہلے امن وامان کی صورتحال کو بحال کیا جانا چاہیے۔انہوں نے بھارتی وزارت داخلہ، یونین ٹیریٹری انتظامیہ اور ضلعی حکام سے موجودہ کشیدہ صورتحال میں بہتری کے لیے اقدامات کرنے کا مطالبہ کیا۔ انہوں نے کہا کہ لوگوں میں پائے جانیوالے خوف و دہشت کو دور کیا جانا چاہیے۔ اس کے بعد ہی بات چیت ہوسکتی ہے ۔ کارگل ڈیموکریٹک الائنس نے ایک بیان میں لہہ اپیکس باڈی کے مطالبات کو دہرایا ہے ۔ڈیموکریٹک الائنس کے رکن، سجاد کرگیلی نے وانگچک کی فوری اور غیر مشروط رہائی کا مطالبہ کیا۔