Live Updates

پنجاب میں ن لیگ اور پیپلز پارٹی کے درمیان لفظی جنگ

منگل 30 ستمبر 2025 18:54

لاہور (اُردو پوائنٹ اخبارتازہ ترین - آن لائن۔ 30 ستمبر2025ء) پنجاب میں حکومتی جماعت ن لیگ اور اتحادی جماعت پیپلز پارٹی کے درمیان لفظی جنگ جاری ہے، اور پیپلز پارٹی نے اپنے تحفظات وزیر اعظم شہباز شریف کے سامنے رکھنے کا فیصلہ کر لیا ہے۔

(جاری ہے)

ذرائع کے مطابق وزیر اعظم شہباز شریف کی بیرون ملک سے وطن واپسی پر پیپلز پارٹی کی قیادت ملاقات کرے گی اور وزیر اعلیٰ پنجاب اور وزراء کی جانب سے پارٹی پر کی جانے والی تنقید کے ساتھ بینظیر انکم سپورٹ پروگرام کے حوالے سے بھی وزیر اعظم کو آگاہ کرے گی۔

پیپلز پارٹی قیادت وزیر اعظم کو یہ باور کرائے گی کہ سیلاب متاثرین کے لیے پارٹی کے امدادی مطالبات وفاق سے ہیں نہ کہ پنجاب سے، اور وزیر اعلیٰ پنجاب اور دیگر وزراء کے بیانات کو بند کروانا ہوگا۔ذرائع نے بتایا کہ اگر پیپلز پارٹی پر تنقید کو نہ روکا گیا تو پارٹی کی سینٹرل ایگزیکٹو کمیٹی کا اجلاس بلا کر آئندہ کا لائحہ عمل طے کیا جائے گا۔