ح*پی آئی اے سی ای او کی اسحاق ڈار سے ملاقات، مستقبل کے منصوبوں پر غور

اوورسیز پاکستانیوں کو سہولت اور دنیا سے روابط بڑھانے پر زور،نائب وزیراعظم کی کارکردگی، سروس کے معیار اور مالی استحکام کا جائزہ لینے کی ہدایت فعال اور جدید پی آئی اے پاکستان کی عالمی شبیہ اجاگر کرنے کیلئے ضروری ہی: نائب وزیراعظم

منگل 30 ستمبر 2025 20:20

:اسلام آباد (اُردو پوائنٹ اخبارتازہ ترین - آن لائن۔ 30 ستمبر2025ء) قومی ایئرلائن (پی آئی ای) کے چیف ایگزیکٹو آفیسر (سی ای او) عامر حیات نے نائب وزیراعظم و وزیر خارجہ اسحاق ڈار سے ملاقات کی، جس میں ایئرلائن کے مستقبل کے منصوبوں اور بہتری کے اقدامات پر تبادلہ خیال کیا گیا۔ترجمان دفتر خارجہ کے مطابق ملاقات کے دوران اسحاق ڈار نے کہا کہ فعال اور جدید پی آئی اے پاکستان کی عالمی شبیہ اجاگر کرنے کے لیے ناگزیر ہے۔

(جاری ہے)

انہوں نے زور دیا کہ قومی ایئرلائن کے ذریعے دنیا کے ساتھ روابط بڑھائے جائیں اور اوورسیز پاکستانیوں کو سہولت فراہم کی جائے۔نائب وزیراعظم نے کہا کہ پی آئی اے تجارت اور سیاحت کے فروغ میں اہم کردار ادا کرسکتی ہے، اس لیے ادارے کو جدید تقاضوں سے ہم آہنگ کرنا وقت کی ضرورت ہے۔ اسحاق ڈار نے پی آئی اے کی کارکردگی، سروس کے معیار اور مالی استحکام کے اقدامات کا بھی تفصیلی جائزہ لینے کی ہدایت دی۔