Live Updates

ح*مرکزی مسلم لیگ لاہور کی 5 ہزار خاندانوں کیلئے 300 ٹن امدادی کھیپ روانہ

ٴْخشک راشن، ملبوسات، چارپائیاں، ادویات، مچھر دانیاں، بچوں کے کپڑے اور گھریلو برتن شامل ہیں

بدھ 1 اکتوبر 2025 20:15

ٴْلاہور (اُردو پوائنٹ اخبارتازہ ترین - آن لائن۔ 01 اکتوبر2025ء) پاکستان مرکزی مسلم لیگ لاہور کی جانب سے جنوبی پنجاب کے سیلاب متاثرین کے لیے 5 ہزار خاندانوں تک امداد پہنچانے کے لیے 300 ٹن خوراک اور ضروری سامان روانہ کیا گیا۔ یہ تیسری بڑی امدادی کھیپ ہے جس میں خشک راشن، ملبوسات، چارپائیاں، ادویات، مچھر دانیاں، بچوں کے کپڑے اور گھریلو برتن شامل ہیں۔

تقریبِ روانگی میں مرکزی مسلم لیگ شعبہ خدمت خلق پاکستان کے صدر چوہدری شفیق الرحمن وڑائچ، مرکزی مسلم لیگ پنجاب کے صدر چوہدری محمد سرور، وسطی پنجاب کے صدر چوہدری حمید الحسن گجر، جنرل سیکرٹری لاہور ڈاکٹر مزمل ہاشمی، سندھ کے صدر فیصل ندیم اور کراچی کے صدر ندیم اعوان نے خصوصی شرکت کی۔ اس موقع پر چوہدری شفیق الرحمن وڑائچ نے کہا کہ سیلاب متاثرین کی خدمت مرکزی مسلم لیگ کا اولین فریضہ ہے، ہم سیاست نہیں بلکہ خدمت کے ذریعے عوام کے دل جیتنے آئے ہیں۔

(جاری ہے)

انہوں نے بتایا کہ اب تک 25 لاکھ لوگوں کو کھانا کھلایا جا چکا ہے، 22 لاکھ متاثرین کو طبی سہولیات فراہم کی گئی ہیں، جبکہ آئندہ متاثرہ خاندانوں کو مکانات اور کسانوں کو زمین، بیج اور کھاد مہیا کی جائے گی۔ رہنماؤں نے عزم ظاہر کیا کہ جب تک متاثرہ خاندان اپنے گھروں کو واپس نہیں لوٹتے، امدادی سلسلہ جاری رہے گا اور مرکزی مسلم لیگ مشکل کی ہر گھڑی میں عوام کے ساتھ کھڑی رہے گی