ٹرمپ کا 20 نکاتی منصوبہ ایک دھوکے کے سوا کچھ نہیں، پوری انسانیت کا قاتل کیسے امن کا دعویدار بن سکتا ہے،جماعت اسلامی سندھ

جمعہ 3 اکتوبر 2025 13:21

کراچی(اُردو پوائنٹ اخبارتازہ ترین - این این آئی۔ 03 اکتوبر2025ء) جماعت اسلامی سندھ کے امیر کاشف سعید شیخ نے کہا ہے کہ امریکی صدر ٹرمپ کا فلسطین میں قیام امن کے لیے 20 نکاتی منصوبہ ایک دھوکے کے سوا کچھ نہیں ہے۔ ایک ایسے ملک کا صدر جس کے ہاتھ ہیروشیما سے لے کر غزہ تک پوری انسانیت کے قتل عام سے رنگے ہوئے ہیں اسے امن کا علمبردار کہہ کر نوبل انعام کے لیے نامزد کرنا شرمناک فعل اور شہداء و امت سے غداری ہے۔

جماعت اسلامی کی جانب سے مرکزی امیر حافظ نعیم الرحمان کی کال پر کل بروز جمعہ سندھ بھر میں کراچی سے کشمور تک یوم احتجاج منایا جائے گا۔ عوام غزہ میں ہونے والے مظالم کے خلاف اورمظلوموں کے ساتھ اظہار یکجہتی کے لیے ہونے والے احتجاجی مظاہروں میں شرکت کرکے انسانیت دوستی کا ثبوت دیں۔

(جاری ہے)

انہوں نے آج ایک بیان میں مزید کہا کہ ڈونلڈ ٹرمپ کا امن معاہدہ غزہ کے تحفظ کے نام پر ایک نئے نوآبادیاتی نظام کا منصوبہ اور کھیل ہے۔

کہا جا رہا ہے کہ فلسطینیوں کی نسل کشی کے سرپرست ٹرمپ غزہ میں دنیا کی امن فوج کی قیادت کریں گے۔ اور عراق میں معصوم بچوں سمیت لاکھوں لوگوں کا قاتل سابق برطانوی وزیر اعظم ٹونی بلیئر غزہ انتظامیہ کا نگران ہوگا۔انسانیت کے قاتل کیسے امن کا دعوید اربن سکتے ہیں۔مائنس حماس امن کا کوئی منصوبہ قابل قبول نہیں ہوگا۔ انہوں نے کہا کہ قوم اسرائیل کی ریاست کو تسلیم کرنے والے حکمرانوں کو عبرت کا نشان بنائے گی۔ ٹرمپ کے نام نہاد منصوبے میں آزاد فلسطینی ریاست کا کوئی ذکر نہیں ہے۔