چوتھا چیف آف دی نیول سٹاف آل پاکستان ہاکی ٹورنامنٹ پاکستان نیوی نے جیت لیا

ہفتہ 4 اکتوبر 2025 20:10

لاہور (اُردو پوائنٹ اخبارتازہ ترین - اے پی پی۔ 04 اکتوبر2025ء) چوتھا چیف آف دی نیول سٹاف آل پاکستان ہاکی ٹورنامنٹ لاہور میں اختتام پذیر ہوگیا۔ فائنل میچ پاکستان نیوی اور ماڑی انرجیز کے درمیان کھیلا گیا جس میں پاکستان نیوی فاتح قرار پائی، جبکہ ماڑی انرجیز اور پاکستان ایئر فورس نے بالترتیب دوسری اور تیسری پوزیشن حاصل کی۔نیشنل ہاکی سٹیڈیم لاہور میں ایک شاندار اختتامی تقریب کا انعقاد کیا گیا جس میں چیف آف نیول سٹاف ایڈمرل نوید اشرف نے بطور مہمان خصوصی شرکت کی۔

نیول چیف نے فاتح ٹیم کو مبارکباد دی اور ٹورنامنٹ کے شاندار انعقاد پر کمانڈر سنٹرل پنجاب، پنجاب سپورٹس بورڈ، پاکستان ہاکی فیڈریشن، مختلف سپانسرز اور میڈیا کی خدمات کو سراہا۔ انہوں نے امید ظاہر کی کہ یہ ٹورنامنٹ قومی کھیل میں عوامی دلچسپی کو فروغ دے گا اور عوامی و نجی اداروں سے اس کے فروغ کے لیے مزید کا وشیں کرنے کی ضرورت پر زور دیا۔

(جاری ہے)

مہمان خصوصی نے جیتنے والی ٹیم اور بہترین کھلاڑیوں میں انعامات تقسیم کیے۔ پاک بحریہ کے زکریا حیات کو ٹورنامنٹ کا بہترین کھلاڑی قرار دیا گیا، جبکہ ماڑی انرجیز کے احمد ندیم اور عبداللہ اشتیاق کو بالترتیب بہترین اسکورر اور بہترین گول کیپر کے اعزاز سے نوازا گیا۔ دس روزہ ٹورنامنٹ میں ملک بھر سے 8 ٹیموں نے حصہ لیا۔ جن میں پاکستان آرمی، پاکستان نیوی، پاکستان ایئر فورس، ماڑی انرجیز، رینجرز، پولیس، پورٹ قاسم اور نیشنل بینک آف پاکستان شامل تھے۔ اس ٹورنامنٹ کا مقصد قومی کھیل ہاکی کو فروغ دینا تھا جو گزشتہ دو دہائیوں سے زوال کا شکار ہے۔میچ دیکھنے کے لیے بڑی تعداد میں سول و فوجی شخصیات، سابق اولمپینز، طلبہ اور عوام اسٹیڈیم میں موجود تھے۔