ہر ماہ گورنرہائوس میں مشاعرہ منعقد کریں گے، گورنرسندھ

ہفتہ 4 اکتوبر 2025 22:50

کراچی (اُردو پوائنٹ اخبارتازہ ترین - اے پی پی۔ 04 اکتوبر2025ء) گورنر سندھ کامران خان ٹیسوری نے کہا ہے کہ ہر ماہ گورنر ہائوس میں ساکنان شہر قائد کے زیر انتظام مشاعرہ منعقد کیا جائے گا۔ ہفتہ کو گورنر ہائوس سے جاری اعلامیہ کے مطابق ان خیالات کا اظہار ا نہوں نے ساکنان شہر قائد کے زیر اہتمام ایک شام "ڈاکٹر آصف ریاض قدیر "کے نام کے اعزاز میں گورنر ہائوس میں منعقدہ مشاعرہ سے کیا۔

انہوں نے کہا کہ آج ہم ادب سے دور ہوتے جا رہے ہیں، کتابیں اور اخبارات پڑھنا ترک کر دیا گیا ہے۔ شاعر، ادیب، صحافی حساس ہوتے ہیں، حساسیت ختم ہو تو کرپشن اور سفاکیت جنم لیتی ہے۔ گورنر سندھ کامران خان ٹیسوری نے مشاعرے میں مہمان خصوصی کی حیثیت سے شرکت کی اور کہا کہ ڈاکٹر آصف ریاض قدیر کی ادبی خدمات کو خراجِ تحسین پیش کرتاہوں۔

(جاری ہے)

تقریب میں چیئرمین ایم کیو ایم پاکستان و وفاقی وزیر ڈاکٹر خالد مقبول صدیقی، سینئر مرکزی رہنما ڈاکٹر فاروق ستار، امین الحق و دیگر بھی شریک تھے۔

تقریب میں معروف شعرامیں شامل ڈاکٹر پیر زادہ قاسم، انور شعور، خواجہ رضی حیدر ، جاوید صبائ، فاضل جمیلی ، سمیت دیگر شعرانے اپنے اپنے کلام پیش کرکے حاضرین محفل کے دلوں کو محظوظ کیا۔ گورنر سندھ نے پیر زادہ قاسم کا شعر پڑھا "مگر جب آپ کی سیرت پر جب ساری گفتگو ہولے ، تویہ بھی یاد رکھئے گا کہ ابھی تو ہم نہیں بھولے"۔ تقریب سے خطاب کرتے ہوئے گورنرسندھ نے مزید کہا کہ کراچی میں اردو زبان پر کام کی اشد ضرورت ہے۔

انہوں نے کہا کہ ووٹ لینا ہو تو "مائی کراچی"، کام کرنا ہو تو "وائے کراچی"۔ انہوں نے کہا کہ گورنر ہائوس میں 14عوامی انیشیٹیوز کا آغاز ہو چکا ہے۔ "امید کی گھنٹی" کے ذریعے عوامی مسائل فوری حل کیے جا رہے ہیں۔ گورنر ہائوس میں جدید آئی ٹی تعلیم بلامعاوضہ فراہم کی جا رہی ہے۔ غریب اور ضرورتمندوں کو لاکھوں کی تعداد میں راشن تقسیم کیا جاچکاہے۔ انہوں نے کہا کہ شعرااور ادب کو زوال پذیر نہیں ہونے دیں گے۔

Facebook Twitter Google + Share on Whatsapp

ہر ماہ گورنرہائوس میں مشاعرہ منعقد کریں گے، گورنرسندھ

متعلقہ عنوان :

مزید قومی خبریں