Live Updates

سندھ اور پنجاب حکومت کے درمیان گشیدگی، صدر زرداری نے محسن نقوی کو کراچی بُلالیا

صدر مملکت کی جانب سے وفاقی اور صوبائی سطح پر معاملات کو افہام و تفہیم سے حل کرنے پر زور دیا گیا

ساجد علی پیر 6 اکتوبر 2025 15:12

سندھ اور پنجاب حکومت کے درمیان گشیدگی، صدر زرداری نے محسن نقوی کو کراچی ..

کراچی ( اُردو پوائنٹ اخبارتازہ ترین۔ 06 اکتوبر2025ء ) صوبہ سندھ اور پنجاب کی حکومت کے درمیان جاری کشیدہ صورتحال کے دوران صدر آصف علی زرداری نے وزیرداخلہ محسن نقوی کو کراچی بُلالیا۔ میڈیا رپورٹس کے مطابق ذرائع کا کہنا ہے کہ صدر مملکت آصف علی زرداری نے صوبائی حکومتوں میں جاری کشیدگی پر وفاقی وزیر داخلہ محسن نقوی سے ٹیلیفون پر رابطہ کیا اور انہیں فوری طور پر کراچی طلب کرلیا۔

ذرائع نے بتایا ہے کہ صدر مملکت اور وزیر داخلہ کے درمیان ٹیلیفونک گفتگو کے دوران سندھ اور پنجاب حکومتوں کے درمیان حالیہ کشیدگی کے معاملے پر تبادلہ خیال کیا گیا، صدر زرداری نے وفاقی اور صوبائی سطح پر معاملات کو افہام و تفہیم سے حل کرنے پر زور دیا، صدر آصف زرداری نے وزیر داخلہ کو فوری طور پر کراچی طلب کیا ہے تاکہ صورتحال کا جائزہ لے کر تناؤ کم کرنے کے لیے اقدامات پر مشاورت کی جا سکے۔

(جاری ہے)

خیال رہے کہ ان دنوں پنجاب اور سندھ کی حکومتوں کے درمیان گرما گرمی پر مبنی بیان بازی کا سلسلہ جاری ہے، اسی سلسلے میں سندھ کے سینئر وزیر شرجیل میمن نے پنجاب حکومت کو ترقیاتی کاموں کے حوالے سے مناظرے کا چیلنج کیا جو وزیر اطلاعات پنجاب عظمیٰ بخاری نے قبول کر لیا اس کے علاوہ دونوں جماعتوں کے علاقائی سطح کے رہنماؤں کے درمیان بیان بازی اور ایک دوسرے پر تنقید کا سلسلہ جاری ہے ۔

اتوار کے روز سندھ کے سینئر وزیر شرجیل انعام میمن نے پریس کانفرنس کے دوران دعویٰ کیا کہ ’پنجاب حکومت ہماری آڑ میں وزیراعظم کو نشانہ بنارہی ہے اور ایسا ماحول پیدا کرنے کی کوشش کی جارہی ہے پیپلزپارٹی وفاقی حکومت کوسپورٹ نہ کرے‘، اس کا جواب دیتے ہوئے وزیر اطلاعات پنجاب عظمیٰ بخاری نے کہا کہ ’آپ اتنے بچے ہیں پنجاب حکومت آپ کو وفاق کے خلاف سازش کرنے کی طرف دھکیل رہی ہے اور آپ اس کا حصہ نہیں بن رہے ہیں، آپ کو پنجاب کے سیلاب متاثرین پر سیاست کرنے کے لیے وزیراعظم نے کہا تھا؟‘۔