سیلانی ویلفیئر انٹرنیشنل ٹرسٹ کی جانب سے کراچی کے سیکڑوں مستحق خاندانوں میں راشن بیگز تقسیم کیے گئے

پیر 6 اکتوبر 2025 18:45

کراچی (اُردو پوائنٹ اخبارتازہ ترین - این این آئی۔ 06 اکتوبر2025ء) سیلانی ویلفیئر انٹرنیشنل ٹرسٹ کی جانب سے کراچی کے سیکڑوں مستحق خاندانوں میں راشن بیگز تقسیم کیے گئے۔وی کیئر کے عنوان سے شروع کی جانے والی اس مہم کے تحت راشن کی تقسیم سیلانی دسترخوان، ملیر ہالٹ برج کے قریب انجام دی گئی۔تفصیلات کے مطابق پورٹ قاسم الیکٹرک پاور کمپنی (پاور چائنا) کے تعاون سے سیلانی ویلفیئر کے رضاکاروں نے 350 مستحق خاندانوں میں راشن بیگز تقسیم کیے۔

پورٹ قاسم الیکٹرک پاور کمپنی دراصل پاور چائنا اوورسیز انویسٹمنٹ کمپنی لمیٹڈ ہے جو پاور کنسٹرکشن کارپوریشن آف چائنا کی ذیلی کمپنی ہے اور اے ایم سی کے باہمی اشتراک سے پاکستان میں قائم کی گئی ہے۔کمپنی کے مطابق یہ امداد پاکستان کے مالیاتی قوانین کے مطابق خیراتی عطیات کی مد میں دی گئی ہے، اور اس سلسلے میں کمپنی میں منظوری کے تمام مراحل مکمل کیے گئے۔

(جاری ہے)

یہ عطیہ کمپنی کے 2025 کے کارپوریٹ سوشل ریسپانسبلٹی (CSR) بجٹ سے فراہم کیا گیا ہے۔ پورٹ قاسم کمپنی نہ صرف مقامی سطح پر بجلی کی مسلسل فراہمی کو یقینی بناتی ہے بلکہ عوامی فلاح و بہبود کے منصوبوں میں بھی سرگرم کردار ادا کرتی ہے۔ کمپنی کے نمائندے کے مطابق وہ سات سال سے زیادہ عرصے سے پاکستان میں کام کر رہے ہیں۔ اس دوران متعدد رفاہی سرگرمیاں انجام دی گئی ہیں۔

مستفید ہونے والوں میں بے روزگار افراد، بیوہ خواتین اور انتہائی کم آمدنی والے گھرانے شامل تھے۔پہلے مرحلے میں سیلانی کے رضاکاروں نے جانچ پڑتال کا عمل مکمل کیا، جس کے بعد اہل خاندانوں کو راشن بیگز کی وصولی کے لیے خصوصی کارڈز جاری کیے گئے۔اس موقع پر چینی کمپنی کے نمائندے، سیلانی ویلفیئر کے عہدیداران اور بڑی تعداد میں رضاکار بھی موجود جو راشن کے بھاری بیگز کی نقل و حمل میں تعاون فراہم کررہے تھے۔