ضلع اورکزئی میں سکیورٹی فورسز کی مؤثر کارروائی، 19 بھارتی سپانسرڈ خوارج ہلاک

ہندوستانی پراکسی فتنہ الخوارج سے تعلق رکھنے والے خارجیوں کی موجودگی کی اطلاع پر سکیورٹی فورسز نے پاکستان کے ضلع اورکزئی میں انٹیلی جنس پر مبنی آپریشن کیا؛ آئی ایس پی آر

ساجد علی بدھ 8 اکتوبر 2025 12:00

ضلع اورکزئی میں سکیورٹی فورسز کی مؤثر کارروائی، 19 بھارتی سپانسرڈ خوارج ..

راولپنڈی ( اُردو پوائنٹ اخبارتازہ ترین۔ 08 اکتوبر2025ء ) سکیورٹی فورسز کی مؤثر کارروائی کے نتیجے میں 19 بھارتی سپانسرڈ خوارج ہلاک ہوگئے۔ مسلح افواج کے شعبہ تعلقات عامہ ( آئی ایس پی آر ) کے مطابق ہندوستانی پراکسی فتنہ الخوارج سے تعلق رکھنے والے خارجیوں کی موجودگی کی اطلاع پر 7 اور 8 اکتوبر 2025ء کی درمیانی شب سکیورٹی فورسز نے پاکستان کے ضلع اورکزئی میں انٹیلی جنس پر مبنی آپریشن کیا، آپریشن کے دوران ہمارے فوجیوں کی مؤثر کارروائی کی وجہ سے 19 بھارتی سپانسرڈ خوارج کو جہنم واصل کردیا گیا۔

ملٹری ترجمان نے بتایا کہ شدید فائرنگ کے تبادلے کے دوران لیفٹیننٹ کرنل جنید عارف جن کی عمر 39 سال، ساکن ڈسٹرکٹ راولپنڈی نے سیکنڈ ان کمانڈ میجر طیب راحت، عمر 33 سال، ساکن ڈسٹرکٹ راولپنڈی کے ساتھ فرنٹ سے اپنے دستوں کی قیادت کرتے ہوئے بہادری سے لڑتے ہوئے شہادت کو گلے لگایا۔

(جاری ہے)

آئی ایس پی آر سے معلوم ہوا ہے کہ قربانی دینے والے 9 بہادر سپاہیوں میں نائب صوبیدار اعظم گل (عمر 38 سال، ساکن ڈسٹرکٹ خیبر)، نائیک عادل حسین (عمر 35 سال، ساکن ڈسٹرکٹ کرم)، نائیک گل امیر (عمر 34 سال، ڈسٹرکٹ ٹانک)، لانس نائیک شیر خان (عمر 31 سال، ڈسٹرکٹ ٹانک کا رہائشی)، لانس نائیک شیر خان (عمر: 31 سال، ضلع کرم کا رہائشی) شامل ہیں۔

اسی طرح لانس نائیک فراز (عمر 32 سال، رہائشی ضلع مانسہرہ)، لانس نائیک ارشاد حسین (عمر 32 سال، رہائشی ضلع کرم)، سپاہی طفیل خان (عمر 28 سال، رہائشی ضلع مالاکنڈ)، سپاہی عاقب علی (عمر 23 سال، رہائشی ضلع صوابی)، سپاہی محمد زاہد (عمر 23 سال، ضلع کرم کا رہائشی) بھی شہید ہوئے۔ پاک فوج کے ترجمان ادارے کا کہنا ہے کہ علاقے میں پائے جانے والے کسی بھی بھارتی سپانسرڈ خارجی کو ختم کرنے کے لیے سینی ٹائزیشن آپریشن کیا جا رہا ہے، کیوں کہ پاکستان کی سکیورٹی فورسز ملک سے بھارتی اسپانسرڈ دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔