بھارتی ریاست اترپردیش میں مسلمان رہنمائوں کی املاک بلڈوزرسے مسمار،متعدد گھرسیل، بریلی سمیت کئی علاقوں میں پولیس کا محاصرہ جاری

بدھ 8 اکتوبر 2025 15:36

نئی دہلی (اُردو پوائنٹ اخبارتازہ ترین - اے پی پی۔ 08 اکتوبر2025ء) بی جے پی کے زیر اقتدار بھارتی ریاست اترپردیش کے شہر بریلی میں حکام نے ایک بار پھر مسلم دشمنی کا مظاہرہ کرتے ہوئے مسلمان رہنمائوں کی املاک کو بلڈوزر چلاکر مسمارکردیا۔کشمیرمیڈیاسروس کے مطابق بھارتی ذرائع ابلاغ کا کہنا ہے کہ کانپور سے شروع ہونے والی’’ آئی لو محمدۖ‘‘ مہم کے بعد ریاستی حکومت نے مسلمانوں کے خلاف بڑے پیمانے پر کارروائیاں شروع کیں۔

رپورٹس کے مطابق وزیر اعلی یوگی آدتیہ ناتھ کے حکم پر احتجاج روکنے کی آڑ میں اتحادِ ملت کونسل کے رہنمائوں اور دیگر مسلمانوں کی املاک کو بلڈوزر سے مسمار کر دیا گیا۔ متعدد گھروں کو سیل کر دیا گیا ہے اور بریلی سمیت کئی علاقوں میں پولیس کا محاصرہ جاری ہے۔

(جاری ہے)

بھارتی میڈیا کے مطابق انٹرنیٹ اور براڈ بینڈ سروسز معطل کر دی گئی ہیں جس کے بعد شہری شدید خوف و بے چینی میں مبتلا ہیں۔

حکام نے اب تک 83افراد کو گرفتار کر لیا ہے جبکہ 2000سے زائد افراد کے خلاف ایف آئی آر درج کی گئی ہیں۔رپورٹس میں بتایا گیا ہے کہ بلڈوزر کارروائی کے بعد مسلمان آبادیوں میں شدید خوف و ہراس پھیل گیا ہے۔ لوگوں کا کہنا ہے کہ یہ کارروائیاں انتقامی بنیادوں پر کی جا رہی ہیں جن کا مقصد مسلمانوں کو دبانا اور خوفزدہ کرنا ہے۔سیاسی تجزیہ کاروں کے مطابق مودی حکومت کے ہندوتوا نظریے نے بھارت کو نفرت، خوف اور انتقام کی آگ میں جھونک دیا ہے جہاں جمہوریت کے لبادے میں آمریت نے جنم لے لیا ہے۔ بھارت میں اقلیتوں خصوصا مسلمانوں کے لئے زندگی گزارنا دن بدن مشکل تر ہوتا جا رہا ہے۔