پاکستان نے سیلاب سے ہونے والے نقصانات کی ابتدائی رپورٹ آئی ایم ایف سے شیئر کر دی

ملک کی معیشت کو سیلاب سے 744 ارب روپے کا نقصان پہنچا، ایک ہزار 37 افراد جاں بحق، ایک ہزار 68 زخمی ہوئے، ذرائع

جمعرات 9 اکتوبر 2025 20:35

اسلام آباد (اُردو پوائنٹ اخبارتازہ ترین - این این آئی۔ 09 اکتوبر2025ء) پاکستان نے حالیہ سیلاب سے ملک میں ہونے والے نقصانات کی ابتدائی رپورٹ آئی ایم ایف سے شیئر کر دی۔ ذرائع کے مطابق ملک کی معیشت کو سیلاب سے 744ارب روپے کا نقصان پہنچا، ایک ہزار 37افراد جاں بحق، ایک ہزار 68زخمی ہوئے، زرعی شعبہ سب سے زیادہ متاثر، 439ارب روپے کا نقصان ہوا۔ذرائع کے مطابق 70اضلاع میں زندگی مفلوج، 65 لاکھ افراد متاثر ہوئے، معاشی ترقی کی شرح 4.2کے مقابلے میں 3.5فیصد رہنے کا امکان ہے، صنعتی شعبے کو 48ارب، خدمات کے شعبے کو 257ارب روپے کا نقصان ہوا۔

(جاری ہے)

ذرائع کے مطابق پنجاب میں سب سے زیادہ 632ارب روپے کے نقصانات ہوئے، خیبرپختونخوا میں 51ارب، سندھ میں 32ارب، بلوچستان میں 7ارب کا نقصان ہوا، سیلاب سے 2ہزار 811کلومیٹر سڑکیں اور 790پل تباہ ہوئے۔ ذرائع کے مطابق ملک بھر میں 2لاکھ 29ہزار سے زائد مکانات متاثر ہوئے، خیبرپختونخوا میں سب سے زیادہ 509اموات ریکارڈ ہوئیں۔زرعی پیداوار کی شرح نمو 4.5کے مقابلے میں 3 فیصد رہنے کا امکان ہے، کپاس کی پیداوار 33فیصد کم ہو کر 72لاکھ بیلز رہ گئی۔ ذرائع کے مطابق چاول، مکئی اور گنے کی پیداوار میں بھی نمایاں کمی کا تخمینہ ہے۔