توشہ خانہ ٹو کیس؛ عمران خان و بشری بی بی کا اہم بیان ریکارڈ، کارروائی سیاسی انتقام قرار دیدی

راولپنڈی ( اُردو پوائنٹ اخبارتازہ ترین۔ 10 اکتوبر 2025ء ) پاکستان تحریک انصاف کے پیٹرن انچیف عمران خان اور ان کی اہلیہ بشریٰ بی بی نے توشہ خانہ ٹو کیس میں اپنے بیانات ریکارڈ کرادیئے جس میں انہوں نے مقدمے کو سیاسی انتقام قرار دے دیا۔ میڈیا رپورٹس کے مطابق خصوصی عدالت میں بیان ریکارڈ کراتے ہوئے سابق وزیراعظم عمران خان نے توشہ خانہ کیس میں بلغاری جیولری سیٹ کی فروخت سے متعلق تمام الزامات کو جھوٹا اور سیاسی انتقام پر مبنی قرار دیا، انہوں نے کہا کہ میرے خلاف من گھڑت کیس کا مقصد سیاست سے نااہل قرار دینا ہے، مذکورہ جیولری سیٹ مئی 2021ء میں سعودی ولی عہد کی جانب سے بشریٰ بی بی کو تحفے میں دیا گیا، اس کی تمام قانونی کارروائی توشہ خانہ پالیسی 2018ء کے مطابق مکمل کی گئی تھی۔

عمران خان کا کہنا ہے کہ تحفہ وزیراعظم آفس کے پروٹوکول سیکشن میں رپورٹ کیا گیا، بلغاری سیٹ کی توشہ خانہ رولز کے تحت قیمت 59 لاکھ روپے لگی جس کی آدھی قیمت 29 لاکھ دیکر قانون کے مطابق تحفہ اپنے پاس رکھا، قومی خزانے میں رقم جمع کرانے کے بعد اسے قانونی طور پر رکھا گیا، توشہ خانہ پالیسی پر مکمل عمل کیا، ایف آئی اے کے دائرہ اختیار سے متعلق توشہ خانہ رولز مکمل خاموش ہیں۔

(جاری ہے)

انہوں نے کم قیمت ظاہر کرنے کے الزام کو مسترد کرتے ہوئے کہا کہ میں نے یا بشریٰ بی بی نے کسی افسر پر اثرانداز ہونے کی نہیں کوشش کی، اس حوالے سے استغاثہ کے گواہوں کے بیانات جھوٹے اور سیاسی بنیادوں پر دیئے گئے ہیں، اس معاملے میں نیب اور ایف آئی اے کو یہ کیس چلانے کا کوئی اختیار نہیں کیونکہ تحقیقات غیر قانونی اور آئین کے خلاف ہیں، ایف آئی اے نے بغیر کسی خودمختار جانچ کے نیب سے کیس آگے بڑھایا۔

سابق وزیراعظم نے مزید کہا کہ مئی 2022ء سے اب تک میرے خلاف 350 سے زائد مقدمات درج کیے جا چکے ہیں تاکہ مجھے سیاست سے باہر رکھا جا سکے، توشہ خانہ کے پچھلے فیصلے پہلے ہی عدالتوں میں کالعدم قرار دیئے جا چکے ہیں، جو اس بات کا ثبوت ہے کہ الزامات بے بنیاد ہیں، میں ایک سیاسی قیدی ہوں، میری عوامی خدمات دیانت داری کو ظاہر کرتی ہیں، استغاثہ اپنا کیس ثابت کرنے میں ناکام رہا، اس لیے دفاعی شواہد پیش کرنے کی ضرورت نہیں۔

اسی طرح عمران کان کی اہلیہ بشریٰ بی بی نے بھی عدالت میں اپنا بیان ریکارڈ کرواتے ہوئے اس حوالے سے عائد تمام تر الزامات کو مسترد کیا، انہوں نے مؤقف اپنایا کہ تحفہ باقاعدہ رپورٹ، قیمت مقرر اور قانون کے مطابق رکھا گیا، میں ایک مکمل طور پر غیر سیاسی خاتون ہیں مگر مجھے صرف عمران خان سے تعلق کی وجہ سے نشانہ بنایا جا رہا ہے، اس حوالے سے نیب اور ایف آئی اے کے دائرہ اختیار پر ہمیں شدید اعتراض ہے کیوں کہ ہمارے خلاف یہ مقدمہ سیاسی انتقام کی مہم ہے۔