Live Updates

اسرائیل اورحماس کے درمیان جنگ بندی برقرار، فلسطینیوں کی شمالی غزہ میں واپسی جاری

ہفتہ 11 اکتوبر 2025 22:00

غزہ /واشنگٹن (اُردو پوائنٹ اخبارتازہ ترین - این این آئی۔ 11 اکتوبر2025ء) غزہ کے شمالی حصے میں فلسطینیوں کی واپسی کا سلسلہ جنگ بندی کے دوسرے روز بھی جاری رہا ۔قطری نشریاتی ادارے ‘ کے مطابق ہزاروں جبراً بے گھر کیے گئے فلسطینی شمالی غزہ کے تباہ شدہ شہروں اور قصبوں کی جانب واپس جانا شروع ہوگئے، اسرائیلی فوج نے جنگ بندی کرتے ہوئے علاقے سے جزوی انخلا شروع کر دیا ہے، یہ اقدام اسرائیل اور حماس کے درمیان امن معاہدے کے پہلے مرحلے کا حصہ ہے۔

امریکی صدر ڈونلڈ ٹرمپ نے کہا کہ غزہ میں زیرِ حراست اسرائیلی قیدیوں کی رہائی پیر کو متوقع ہے۔حماس، فلسطینی اسلامی جہاد اور عوامی محاذ برائے آزادیِ فلسطین (پی ایف ایل ایف) نے کہا کہ وہ غزہ کی پٹی پر کسی بھی غیر ملکی سرپرستی کو مسترد کرتے ہیں۔

(جاری ہے)

غزہ کے حکام نے جنگ کے دوران اسرائیل کی جانب سے کیے گئے مبینہ جنگی جرائم اور نسل کشی کی آزاد بین الاقوامی تحقیقات کا مطالبہ کیا ہے۔

اقوام متحدہ کی ریلیف ایجنسی نے غزہ کے تمام راستے کھولنے کا مطالبہ کیا ہے اور کہا کہ 6 ہزار امدادی ٹرک چند گھنٹوں میں غزہ پہنچنے کے لیے تیار ہیں،اکتوبر 2023 سے اسرائیل کی غزہ پر مسلط کردہ جنگ میں اب تک کم از کم 67 ہزار 211 فلسطینی شہید اور ایک لاکھ 69 ہزار 961 زخمی ہو چکے ہیں۔7 اکتوبر 2023 کو حماس کے حملوں میں ایک ہزار 139 افراد اسرائیل میں ہلاک ہوئے تھے، اور تقریباً 200 افراد کو یرغمال بنا لیا گیا تھا،غزہ میں گزشتہ شب، 2 سال بعد پہلی رات تھی، جب اسرائیلی ڈرون کی آوازیں تھیں نہ ہی دھماکوں اور بمباری کی۔