Live Updates

تحریکِ لبیک کے پرتشدد اور مسلح احتجاج کو غزہ کے مظلوم عوام سے کسی طور پر بھی اظہار یکجہتی قرار نہیں دیا جاسکتا، ترجمان پنجاب پولیس

ہفتہ 11 اکتوبر 2025 21:10

لاہور (اُردو پوائنٹ اخبارتازہ ترین - اے پی پی۔ 11 اکتوبر2025ء) ترجمان پنجاب پولیس نے اپنے بیان میں کہا ہے کہ تحریکِ لبیک کے پرتشدد اور مسلح احتجاج کا مقصد ملک کا امن و امان برباد کرنا، عوام کیلئے مشکلات کھڑی کرنا اور پولیس اہلکاروں پر تشدد کرنے کے علاوہ کچھ نہیں۔ اسے غزہ کے مظلوم عوام سے کسی طور پر بھی اظہار یکجہتی قرار نہیں دیا جاسکتا۔ ترجمان کے مطابق غزہ میں امن معاہدہ ہوچکا ہے جس سے وہاں کے مسلمان خوش، مطمئن اور امن قائم ہونے پر اللہ کا شکر ادا کر رہے ہیں جبکہ ٹی ایل پی پاکستان میں توڑ پھوڑ کرکے اپنے مذموم مقاصد کی تکمیل چاہتی ہے۔

ایسے اقدامات سے واضح نظر آرہا ہے کہ ٹی ایل پی کو غزہ میں امن قائم ہونے سے کوئی سروکار نہیں جبکہ یہ انتشاری روش اسرائیلی یہودیوں کے مشن کو تقویت دینے کے مترادف ہے۔

(جاری ہے)

احتجاج میں موجود مسلح جتھے پولیس اہلکاروں پر شدید تشدد کررہے ہیں اور ساتھ ہی سوشل میڈیا پر اپنی مظلومیت کا بیانیہ بناکر عوام کو گمراہ کررہے ہیں۔پولیس اہلکاروں کا اغوا اور ان پر کیا جانے والا بہیمانہ تشدد کسی صورت فلسطین کے مسلمانوں کی ترجمانی نہیں کرتا بلکہ یہ سراسر ریاست کی رٹ کو چیلنج کرنے کے مترادف ہے جسکی کسی صورت اجازت نہیں دی جاسکتی۔

قانون ہاتھ میں لینے والوں سے آہنی ہاتھوں سے نمٹا جائے گا اور ریاست کے وقار پر کوئی سمجھوتہ نہیں کیا جائے گا۔ عوام سے اپیل ہے کہ افواہوں سے دور رہیں، شرپسند عناصر کا ساتھ نا دیں اور امن و امان قائم رکھنے میں پولیس کا بھرپور ساتھ دیں۔