سپیکر قومی اسمبلی سردار ایاز صادق کا افغان جارحیت کا منہ توڑ جواب دینے پر پاک افواج کو زبردست خراجِ تحسین

اتوار 12 اکتوبر 2025 13:30

اسلام آباد (اُردو پوائنٹ اخبارتازہ ترین - اے پی پی۔ 12 اکتوبر2025ء) سپیکر قومی اسمبلی سردار ایاز صادق نے پاک افغان بارڈر پر افغانستان کی بلا اشتعال جارحیت کی شدید مذمت کرتے ہوئےپاک افواج کو افغان جارحیت کا منہ توڑ جواب دینے پر زبردست خراجِ تحسین پیش کیا ہے۔ سپیکر قومی اسمبلی کے میڈیا آفس سے جاری بیان کے مطابق انہوں نے کہا کہ شہری آبادی پر افغان فورسز کی فائرنگ عالمی قوانین اور انسانی حقوق کی کھلی خلاف ورزی ہے، افغانستان کی اشتعال انگیزی خطے کے امن و استحکام کے لیے خطرہ ہے،پوری قوم پاک افواج کے ساتھ سیسہ پلائی دیوار کی مانند کھڑی ہے۔

سپیکر سردار ایاز صادق نے کہا کہ کسی کو بھی پاکستان کی سالمیت اور خودمختاری پر حملے کی اجازت نہیں دی جائے گی،مادرِ وطن کے دفاع کے لیے پاک افواج ہر لمحہ تیار ہے۔

(جاری ہے)

سپیکر سردار ایاز صادق نے کہا کہ پاکستان نے ہمیشہ ایک پرامن، مستحکم اور خوشحال افغانستان کی حمایت کی ہے،پاکستان گزشتہ چار دہائیوں سے زائد عرصے سے چالیس لاکھ سے زیادہ افغان مہاجرین کی میزبانی کر رہا ہے۔

سپیکر سردار ایاز صادق نے کہا کہ پاکستان ایک پر امن ملک ہے اور کسی کے خلاف جارحانہ عزائم نہیں رکھتا،پاکستان کے صبر کو کمزوری نہ سمجھا جائے، سرحدی خلاف ورزیاں ناقابلِ برداشت ہیں۔ سپیکر سردار ایاز صادق نے کہا کہ علاقائی امن و ترقی کے لیے باہمی احترام اور سفارتی تعاون ضروری ہے،فیلڈ مارشل سید عاصم منیر کی قیادت میں پاک فوج کسی بھی جارحیت کا منہ توڑ جواب دینے کی بھرپور صلاحیت رکھتی ہے۔ سپیکر سردار ایاز صادق نے کہا کہ افغانستان کی سر زمین پاکستان کے خلاف دہشتگردی میں استعمال ہو رہی ہے،پاکستان کی مسلح افواج کی موجودگی میں کوئی بھی دشمن پاکستان کی طرف میلی آنکھ سے دیکھنے کی جرات نہیں کر سکتا۔