پاکستان صدر ٹرمپ کے امن میں غیرمعمولی کردار کو ہمیشہ قدر کی نگاہ سے دیکھے گا، وزیراعظم

ہماری سب سے اہم ترجیح غزہ میں جاری نسل کشی فوراً رکوانا تھی، امریکی صدر کے شکر گزار ہیں جنہوں نے وعدہ کیا کہ وہ اس ظلم کو رکوانے کیلئے قدم اٹھائیں گے اور اپنا وعدہ پورا کیا؛ وطن واپسی پر بیان

ساجد علی منگل 14 اکتوبر 2025 12:45

پاکستان صدر ٹرمپ کے امن میں غیرمعمولی کردار کو ہمیشہ قدر کی نگاہ سے ..

شرم الشیخ/اسلام آباد ( اُردو پوائنٹ اخبارتازہ ترین۔ 14 اکتوبر2025ء ) وزیراعظم شہباز شریف کا کہنا ہے کہ پاکستان صدر ٹرمپ کے امن میں غیرمعمولی کردار کو ہمیشہ قدر کی نگاہ سے دیکھے گا۔ تفصیلات کے مطابق مصر کے شہر شرم الشیخ میں منعقدہ غزہ امن کانفرنس میں شرکت کے بعد وطن واپسی کے لیے روانگی سے قبل اپنے خیالات کا اظہار کرتے ہوئے انہوں نے کہا کہ پاکستان کی سب سے اہم ترجیح غزہ میں جاری نسل کشی کو فوراً رکوانا تھی، میں جبکہ غزہ امن سربراہی اجلاس کے بعد وطن واپس روانہ ہو رہا ہوں تو اس تاریخی اجلاس کی تبدیلی لانے والی نوعیت اور پاکستان کے گہرے کردار پر چند باتیں شیئر کرنا چاہتا ہوں۔

وزیرِاعظم کا کہنا ہے کہ پاکستان کی سب سے اہم ترجیح غزہ پر جاری نسل کشی فوراً رکوانا تھی دیگر برادر ممالک کے ساتھ مل کر ہم نے اس مطالبے کو بار بار دوہرایا اور مضبوط انداز میں پیش کیا، ہم صدر ڈونلڈ ٹرمپ کے شکر گزار ہیں جنہوں نے وعدہ کیا کہ وہ اس ظلم کو رکوانے کے لیے قدم اٹھائیں گے اور انہوں نے اپنا وعدہ پورا کیا، پاکستان صدر ٹرمپ کے امن میں غیرمعمولی کردار کو ہمیشہ قدر کی نگاہ سے دیکھے گا۔

(جاری ہے)

اس حوالے سے اپنے پالیسی بیان شہباز شریف نے مزید یہ بھی کہا کہ فلسطینی عوام کی آزادی، عزتِ نفس اور خوشحالی پاکستان کے لیے ہمیشہ اولین ترجیح رہے گی، انشاءاللہ 1967ء سے قبل کی سرحدوں کے مطابق ایک مضبوط اور خودمختار فلسطینی ریاست کا قیام عمل میں آئے گا، جس کا دارالحکومت القدس الشریف ہو، یہی پاکستان کی مشرقِ وسطیٰ پالیسی کی بنیاد ہے اور ہمیشہ رہے گی۔