انکم ٹیکس ریٹرن جمع کرانے کی تاریخ میں31اکتوبر تک توسیع

ٹیکس نیٹ میں اضافہ اور قومی معیشت کو استحکام ملے گا‘لاہور چیمبر کا خیرمقدم

بدھ 15 اکتوبر 2025 19:40

لاہور (اُردو پوائنٹ اخبارتازہ ترین - این این آئی۔ 15 اکتوبر2025ء) فیڈرل بورڈ آف ریو نیو نے انکم ٹیکس ریٹر ن جمع کرانے کی تاریخ میں دوسری بار توسیع کا اعلان کر دیا ۔ایف بی آر کی جانب سے انکم ٹیکس ریٹرن جمع کرانے کی تاریخ میں 31اکتوبر تک توسیع کی گئی ہے ۔اس سے قبل انکم ٹیکس ریٹرن جمع کرانے کی آخری تاریخ 30ستمبر مقرر کی گئی تھی جسے 15اکتوبرتک بڑھایا گیا تھا۔

ٹیکس بارز ایسوسی ایشنز ، چیمبرز اور تاجرتنظیموں کی جانب سے کی گئی اپیلوں پر ایف بی آر نے ریٹرن جمع کرانے کی تاریخ میں ایک بار پھر توسیع کرتے ہوئے اسے 31اکتوبر مقرر کر دیاہے۔علاوہ ازیں صدر لاہور چیمبر فہیم الرحمن سہگل، سینئر نائب صدر تنویر احمد شیخ اور نائب صدر خرم لودھی نے حکومت پاکستان اور ایف بی آر کا شکریہ ادا کیا ہے کہ انہوں نے لاہور چیمبر کی سفارش کو تسلیم کرتے ہوئے کاروباری طبقے کو بروقت ریلیف فراہم کیا۔

(جاری ہے)

صدر فہیم الرحمن سہگل نے کہا کہ لاہور چیمبر نے مسلسل اس امر کی نشاندہی کی تھی کہ موجودہ ملکی صورتحال، بارڈر پر کشیدگی، سیلاب اور بجٹ میں متعارف کروائی گئی ریفارمز کی پیچیدگیوں کے باعث تاجروں اور صنعتکاروں کے لیے ریٹرن جمع کرانا مشکل ہو گیا ہے، اسی لیے تاریخ میں توسیع ناگزیر تھی۔انہوں نے کہا کہ ایف بی آر کا یہ فیصلہ نہ صرف کاروباری طبقے کے لیے سہولت پیدا کرے گا بلکہ اس سے زیادہ سے زیادہ افراد کو ریٹرن جمع کرانے کا موقع بھی ملے گا، جس سے ٹیکس نیٹ میں اضافہ اور قومی معیشت کو استحکام ملے گا۔

سینئر نائب صدر تنویر احمد شیخ اور نائب صدر خرم لودھی نے کہا کہ ایف بی آر اور حکومت کا یہ فیصلہ کاروباری طبقے کے حقیقی مسائل کو سمجھنے کی عکاسی کرتا ہے۔ انہوں نے کہا کہ ایسے اقدامات سے حکومت اور تاجروں کے درمیان اعتماد میں اضافہ ہوگا اور رضاکارانہ ٹیکس ادائیگی کے رجحان کو فروغ ملے گا۔عہدیداران نے کہا کہ لاہور چیمبر آئندہ بھی حکومت اور کاروباری طبقے کے درمیان پل کا کردار ادا کرتا رہے گا تاکہ کاروبار میں آسانی اور معاشی ترقی کے اہداف حاصل کیے جا سکیں۔