وفاقی کابینہ کا وزیراعظم محمد شہباز شریف کو غزہ امن معاہد ہ میں انتہائی اہم کردار پر شاندار خراج تحسین

اسلام آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) وفاقی کابینہ نے وزیراعظم محمد شہباز شریف کو غزہ امن معاہدہ میں انتہائی اہم کردار پر شاندار خراج تحسین پیش کیا ہے جبکہ ٹریڈ آرگنائزیشن رولز، 2013 کے شیڈول ای میں ترامیم ،انٹر بورڈ کوآرڈینیشن کمیشن ایکٹ 2023 میں ترامیم،جموں وکشمیر (ایڈمنسٹریشن آف پراپرٹی) آرڈیننس 1961 میں ترامیم ، کراچی پورٹ ٹرسٹ ایکٹ 1986, گوادر پورٹ اتھارٹی آرڈیننس 2002 اور پورٹ قاسم ایکٹ 1973 کو ایس او ایز ایکٹ 2023 سے مطابقت میں لانے کے حوالے ترامیم کی توثیق کر دی ہے۔

جمعرات کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیرِ صدارت وفاقی کابینہ کا اجلاس وزیراعظم ہاؤس میں منعقد ہوا۔وفاقی کابینہ کے اراکین نے شرم الشیخ، مصر میں منعقد ہوئے غزہ امن سربراہی اجلاس میں کی گئی وزیراعظم محمد شہباز شریف کی تقریر کی زبردست پذیرائی کی۔

(جاری ہے)

وفاقی کابینہ نے وزیراعظم محمد شہباز شریف کو غزہ امن معاہد ہ میں انتہائی اہم کردار پر شاندار خراج تحسین پیش کیا۔

وفاقی کابینہ کے اراکین نے ڈیسک بجا کر وزیراعظم کو داد دی۔وفاقی کابینہ کے اراکین کا شکریہ ادا کرتے ہوئے وزیراعظم نے کہا کہ مصر کے شہرشرم الشیخ میں اللہ تعالیٰ نے پاکستان کو بے پناہ عزت دی ، پاکستان نے غزہ امن معاہد ہ میں انتہائی اہم کردار ادا کیا۔ انہوں نے کہا کہ معرکہ حق کے بعد دنیا نے پاکستان کو انتہائی اہم ملک کے طور پر دیکھنا شروع کیا ہے ۔

ان کا کہنا تھا کہ ہم اللہ تعالیٰ کا جتنا شکر کریں کم ہے کہ اس نے دنیا بھر میں پاکستان کو عزت و تکریم سے نوازا۔وفاقی کابینہ نے کابینہ کمیٹی برائے قانون سازی کے 23 ستمبر، 2025 کے اجلاس میں کئے گئے فیصلوں کی توثیق کی ۔ ٹریڈ آرگنائزیشن رولز، 2013 کے شیڈول ای میں ترامیم کی توثیق کی گئی ،ان ترامیم کے تحت پاکستان بھر میں خواتین کے چیمبرز آف کامرس اینڈ انڈسٹری کے لائسنس گرانٹ فیس اور لائسنس کی تجدید کی فیس میں کوئی اضافہ نہیں کیا جائے گا۔

علاوہ ازیں انٹر بورڈ کوارڈینیشن کمیشن ایکٹ 2023 میں ترامیم کی توثیق بھی کر دی گئی۔ ان ترامیم کے تحت پاکستان بھر کے تعلیمی بورڈز میں خواتین اراکین کی 33 فیصد نما ئندگی یقینی بنانے کی ہدایت کی گئی ہے۔ مزید برآں جموں وکشمیر (ایڈمنسٹریشن آف پراپرٹی) آرڈیننس 1961 میں ترامیم ، کراچی پورٹ ٹرسٹ ایکٹ 1986، گوادر پورٹ اتھارٹی آرڈیننس 2002 اور پورٹ قاسم ایکٹ 1973 کو ایس او ایز ایکٹ 2023 سے مطابقت میں لانے کے حوالے سے ترامیم کی بھی توثیق کر دی گئی ۔

وفاقی کابینہ نے کابینہ کمیٹی برائے قانون سازی کے 8 اکتوبر 2025 کے اجلاس میں کئے گئے فیصلوں کی توثیق کی ۔ پاکستان ڈیجیٹل اتھارٹی (مینجمنٹ اینڈ یوٹیلائزیشن آف ڈیجیٹل نیشن فنڈ) رولز ، 2025 کی توثیق کی گئی۔ ادارہء شماریات پاکستان کی گورننگ کونسل میں بھی ترامیم کی توثیق کی گئی۔وفاقی کابینہ نے کابینہ کمیٹی برائے قانون سازی کے 10 اکتوبر، 2025 کے اجلاس میں کئے گئے فیصلوں کی توثیق کی ۔ آرمڈ فورسز نرسنگ سروسز رولز 1969 میں ترامیم کی توثیق کر دی گئی۔ علاوہ ازیں سول ان مینڈ (Civil unmanned) ایئر کرافٹ رولز 2025 کی توثیق کر دی گئی۔ اس کے علاوہ پاسپورٹ امینڈمینٹ رولز 2021 میں ترامیم کی توثیق کی گئی ۔