پیر مہر علی شاہ بارانی زرعی یونیورسٹی راولپنڈی میں تین روزہ بین الاقوامی ایگریکلچر کانفرنس اور ایکسپو کا انعقاد

جمعہ 17 اکتوبر 2025 18:43

راولپنڈی (اُردو پوائنٹ اخبارتازہ ترین - اے پی پی۔ 17 اکتوبر2025ء) پیر مہر علی شاہ بارانی زرعی یونیورسٹی راولپنڈی اور وائس چانسلر پروفیسر ڈاکٹر قمر الزمان کی زیر قیادت پاکستان کے زرعی منظر نامے کو تبدیل کرنے میں عملی طور پر کوشاں ہے۔ اسی سلسلے میں 20 سے 22 اکتوبر تک یونیورسٹی میں دوسری بین الاقوامی پریسیژن ایگریکلچر کانفرنس اور ایکسپو کا انعقاد کیا جا رہا ہے۔

اس کانفرنس کے افتتاحی سیشن میں وفاقی وزیر برائے منصوبہ بندی، ترقی اور خصوصی اقدامات پروفیسر احسن اقبال چوہدری مہمان خصوصی کی حیثیت سے شرکت کریں گے جبکہ سینیٹراور وزیراعظم کے خصوصی مشیر برائے سیاسی امور رانا ثناء اللہ خان ایگری ایکسپو کے مہمان خصوصی ہوں گے۔ اس تین روزہ بین الاقوامی کانفرنس میں کینیڈا، امریکہ، چین، پاکستان اور دنیا بھر سے معروف زرعی ماہرین اور محققین شرکت کر رہے ہیں۔

(جاری ہے)

شرکا موسمیاتی تبدیلی، خودکار کاشتکاری کے نظام اور جدید زراعت میں مصنوعی ذہانت کے کردار سمیت اہم موضوعات پر تحقیقی مقالات پیش کریں گے۔ کانفرنس میں 8 مختلف ٹینیکل سیشنز، فیلڈ وزٹ اور جدید زرعی آلات اور مشینری کی نمائش بھی شامل ہے۔اس کانفرنس کا مقصد کسانوں اور سٹیک ہولڈرز کو روایتی طریقہ کاشت سے جدید زراعت کی طرف لانا اور زرعی پیداوار کو بڑھاتے ہوئے غذائی تحفظ کو یقینی بنانا ہے۔