لاہور (اُردو پوائنٹ اخبارتازہ ترین - این این آئی۔ 20 اکتوبر2025ء) محکمہ داخلہ
پنجاب نے سول ڈیفنس رضاکاروں کیلئے بطور ماسٹر ٹرینرز بیسک لائف سپورٹ تربیت کا آغاز کر دیا۔ سروسز انسٹی ٹیوٹ آف میڈیکل سائنسز میں سول ڈیفنس والنٹیئرز ٹریننگ پروگرام کی افتتاحی تقریب کا انعقاد کیا گیا جس میں چیئرمین کابینہ کمیٹی برائے
امن و امان و وزیر صحت خواجہ سلمان رفیق اور صوبائی وزیر ٹرانسپورٹ بلال اکبر خان نے بطور مہمان خصوصی شرکت کی۔
تقریب میں ڈپٹی کمشنر
لاہور سید موسیٰ رضا، پرنسپل سروسز انسٹی ٹیوٹ آف میڈیکل سائنسز پروفیسر زاہرہ خانم، ایم ایس سروسز ہسپتال لاہور
ڈاکٹر عابد محمود غوری، ایڈیشنل سیکرٹری محکمہ داخلہ عاصمہ اعجاز چیمہ، ڈائریکٹر سول ڈیفنس تسنیم علی خاں، اے ڈی سی جی حافظ مدثر اور شرکاء کی کثیر تعداد موجود تھی۔
(جاری ہے)
صوبائی وزراء نے ٹریننگ میں نمایاں کارکردگی کا مظاہرہ کرنے والے رضاکاروں میں تعریفی اسناد بھی تقسیم کیں۔
ترجمان محکمہ داخلہ
پنجاب کے مطابق سروسز انسٹیٹیوٹ آف میڈیکل سائنسز میں رضاکاروں کو قدرتی آفات، حادثات یا بیماری کی صورت میں انسانی جان بچانے کیلئے بنیادی تربیت دی جا رہی ہے۔ سول ڈیفنس رضاکاروں کو مریضوں کی سانس بحال کرنے کی بھی تربیت دی گئی۔ نوجوانوں کی بڑی تعداد سول ڈیفنس میں بطور رضاکار شامل ہو رہی ہے۔ تقریب میں بتایا گیا کہ یہ ماسٹر ٹرینرز صوبہ بھر میں جاکر سول ڈیفنس رضاکاروں کو بیسک لائف سپورٹ کی تربیت فراہم کریں گے۔
صوبائی وزیر صحت و چیئرمین کابینہ کمیٹی برائے
امن و امان خواجہ سلمان رفیق نے تقریب کے شرکاء سے خطاب میں کہا کہ 65 کی پاک
بھارت جنگ کے دوران والد نے
لاہور میں بطور چیف وارڈن خدمات سر انجام دیں۔ انہوں نے کہا کہ 6 اور 7 مئی کی درمیانی شب کو بہاولپور پہنچا جہاں
بھارت کی جانب سے معصوم بچوں اور عورتوں کو دہشگردی کا نشانہ بنایا گیا تھا اور تب فوری طور پر سول ڈیفنس کو آرگنائز کرنے کی ہدایت کی گئی۔
انہوں نے بتایا کہ اس سے قبل سول ڈیفنس کا کوئی پرسانِ حال نہیں تھا۔ خواجہ سلمان رفیق نے کہا کہ سول ڈیفنس کو آرگنائز کرنے کیلئے
نور الامین مینگل،
ڈاکٹر احمد جاوید قاضی اور محکمہ داخلہ کے افسران کو کریڈٹ دینا چاہتا ہوں۔ آج سے بارہ سال پہلے
میاں شہباز شریف کے دور حکومت میں سی
پی ایس پی کے ساتھ سول ڈیفنس کا پروگرام شروع کروایا تھا اور فنڈنگ بھی کروائی تھی۔
حالیہ
سیلاب کے دوران سول ڈیفنس سمیت تمام متعلقہ محکمہ جات نے بے مثال خدمات سر انجام دی ہیں۔ صوبائی وزیر ٹرانسپورٹ بلال اکبر خان نے تقریب کے شرکاء سے خطاب میں کہا کہ آج وہ بھی اپنے آپ کو بطور ایک رضاکار رجسٹر کروا رہے ہیں۔ بلال اکبر خان نے کہا کہ
پاکستان نے
بھارت کو جارحیت کا منہ توڑ جواب دیا تھا۔ انہوں نے کہا کہ روزانہ کی بنیاد پر ماسٹر ٹرینرز کو تربیت دی جائے گی جو
پنجاب بھر میں جاکر رضاکاروں کی تربیت کریں گے۔
بلال اکبر خان نے کہا کہ ہر شہری کو بیسک لائف سپورٹ کی بنیادی تربیت دینا لازم ہونا چاہیے اور وزیراعلی
پنجاب کی سربراہی میں سول ڈیفنس کو جدید خطوط پر استوار کیا جا رہا ہے۔ پرنسپل سروسز انسٹی ٹیوٹ آف میڈیکل سائنسز پروفیسر زاہرہ خانم نے کہا کہ سروسز انسٹیٹیوٹ آف میڈیکل سائنسز میں رضاکاروں کو دل کے مریضوں کو ایمرجنسی سپورٹ دینے کی تربیت دی گئی۔
ایڈیشنل سیکرٹری محکمہ داخلہ عاصمہ اعجاز چیمہ نے کہا کہ انسانی جان بچانا نہایت قیمتی عمل ہے جس کیلئے رضاکاروں کو تیار کر رہے ہیں۔ انہوں نے بتایا کہ جنگی حالات،
سیلاب سے متاثرہ علاقے یا سموگ کا مقابلہ کرنے کیلئے سول ڈیفنس رضاکار ہر دم تیار ہیں۔ ڈائریکٹر سول ڈیفنس تسنیم علی خاں نے بتایا کہ صرف 40 دنوں میں 1 لاکھ 64 ہزار رضاکاروں نے آن لائن رجسٹریشن کروائی جو نہایت خوش آئیند ہے۔ انہوں نے بتایا کہ شہری بطور رضاکار سول ڈیفنس کا حصہ بننے کیلئے آن لائن پورٹل VCD.HOME.GOP.PK پر رجسٹریشن کروا سکتے ہیں۔ صرف کسی ایک میدان میں نہیں بلکہ شہری اپنی صلاحیت و قابلیت کے مطابق کسی بھی میدان میں خدمات کی فراہمی کیلئے رضاکار بن سکتے ہیں۔
