وزیراعظم شہبازشریف کا بلوچستان کا کامیاب دورہ اور ترقیاتی منصوبوں کا افتتاح ان کے ترقی یافتہ بلوچستان کے عزم کی عملی عکاسی ہے،جمال شاہ کاکڑ

جمعہ 9 جنوری 2026 23:03

کوئٹہ (اُردو پوائنٹ اخبارتازہ ترین - اے پی پی۔ 09 جنوری2026ء) پاکستان مسلم لیگ (ن)بلوچستان کے جنرل سیکرٹری اور رکن قومی اسمبلی جمال شاہ کاکڑ نے کہا ہے کہ وزیراعظم شہباز شریف کا بلوچستان کا کامیاب دورہ اور ترقیاتی منصوبوں کا افتتاح ان کے ترقی یافتہ بلوچستان کے عزم کی عملی عکاسی ہے،موجودہ حکومت وفاق اور صوبوں کے درمیان ہم آہنگی، مشاورت اور باہمی اعتماد کے ذریعے بلوچستان کو ترقی اور خوشحالی کی راہ پر گامزن کر رہی ہے پاکستان مسلم لیگ (ن)بلوچستان کے عوام کی محرومیوں کے خاتمے، پائیدار ترقی اور ایک روشن مستقبل کے لیے وزیراعظم کے وژن کے مطابق اپنا کردار ادا کرتی رہے گی۔

ان خیالات کا اظہار انہوں نے اے پی پی سے خصوصی بات چیت کرتے ہوئے کیا۔جمال شاہ کاکڑ نے کہا کہ وزیراعظم محمد شہباز شریف نے ہمیشہ بلوچستان کو قومی ترقی کے دھارے میں شامل کرنے کو اپنی اولین ترجیح قرار دیا ہے۔

(جاری ہے)

انہوں نے کہا کہ این۔ 25 جیسی اہم قومی شاہراہ نہ صرف بلوچستان کو ملک کے دیگر علاقوں سے جوڑتی ہے بلکہ یہ معاشی سرگرمیوں، تجارت اور عوامی سہولیات کے فروغ میں کلیدی کردار ادا کرے گی۔

آواران۔جھلجا روڈ جیسے منصوبے دور دراز علاقوں کے عوام کے لیے ترقی کے نئے دروازے کھولیں گے۔انہوں نے کہا کہ بلوچستان میں دانش اسکولوں کا قیام وزیراعظم شہباز شریف کے اس وژن کی عکاسی کرتا ہے جس کا مقصد غریب اور پسماندہ علاقوں کے باصلاحیت بچوں اور بچیوں کو معیاری تعلیم کی فراہمی ہے۔ ان اسکولوں کے ذریعے قلعہ سیف اللہ سے لے کر تربت اور آواران تک، وسائل سے محروم طلبہ کو یکساں تعلیمی مواقع میسر آئیں گے، جو مستقبل میں صوبے اور ملک کا نام روشن کریں گے۔

جمال شاہ کاکڑ نے کہا کہ 2022 کے تباہ کن سیلاب کے بعد وزیراعظم شہباز شریف کی ہدایت پر وفاقی حکومت نے بلوچستان کے متاثرین کو تنہا نہیں چھوڑا۔ سیلاب سے متاثرہ خاندانوں کے لیے گھروں کی تعمیر، سرٹیفکیٹس اور امدادی چیکس کی تقسیم اس بات کا ثبوت ہے کہ وفاق مشکل کی گھڑی میں بلوچستان کے عوام کے ساتھ کھڑا ہے۔انہوں نے کہا کہ وزیراعظم شہباز شریف کا بلوچستان کی ترقی کے لیے عزم غیر متزلزل ہے اور وہ صوبے کے بنیادی ڈھانچے، تعلیم، صحت اور روزگار کے مواقع کی بہتری کے لیے عملی اقدامات کر رہے ہیں۔

موجودہ حکومت وفاق اور صوبوں کے درمیان ہم آہنگی، مشاورت اور باہمی اعتماد کے ذریعے بلوچستان کو ترقی اور خوشحالی کی راہ پر گامزن کر رہی ہے۔جمال شاہ کاکڑ نے کہا کہ پاکستان مسلم لیگ (ن)بلوچستان کے عوام کی محرومیوں کے خاتمے، پائیدار ترقی اور ایک روشن مستقبل کے لیے وزیراعظم کے وژن کے مطابق اپنا کردار ادا کرتی رہے گی۔