وزیراعظم محمد شہباز شریف کا حالیہ دورہ بلوچستان کی ترقی اور عوامی فلاح کے لیے خوش آئند ہے ،صوبائی وزیر میر سلیم کھوسہ

جمعہ 9 جنوری 2026 23:00

کوئٹہ (اُردو پوائنٹ اخبارتازہ ترین - اے پی پی۔ 09 جنوری2026ء) پاکستان مسلم لیگ (ن)کے بلوچستان اسمبلی میں پارلیمانی لیڈر اور صوبائی وزیرِ مواصلات میر سلیم احمد کھوسہ نے وزیراعظم محمد شہباز شریف کے حالیہ دورہ بلوچستان کو صوبے کی ترقی اور عوامی فلاح کے لیے ایک خوش آئند اور تاریخی پیش رفت قرار دیتے ہوئے کہاہے کہ دانش اسکول جیسے منصوبے غریب اور مستحق گھرانوں کے بچوں اور بچیوں کے لیے روشن مستقبل کی ضمانت ہیں بلوچستان کی ترقی، انفراسٹرکچر کی بہتری، تعلیم، صحت اور عوامی فلاح کے منصوبے حکومت کی اولین ترجیحات میں شامل ہیں۔

ان خیالات کااظہار انہوں نے بات چیت کرتے ہوئے کیا۔میر سلیم احمد کھوسہ نے کہا کہ وزیراعظم کی جانب سے ضلع صحبت پور میں دانش اسکول کا سنگِ بنیاد رکھنا اس امر کا واضح ثبوت ہے کہ وفاقی حکومت بلوچستان کے پسماندہ اور دور دراز علاقوں میں معیاری تعلیم کے فروغ کے لیے سنجیدہ اور پرعزم ہے۔

(جاری ہے)

انہوں نے کہا کہ دانش اسکول جیسے منصوبے غریب اور مستحق گھرانوں کے بچوں اور بچیوں کے لیے روشن مستقبل کی ضمانت ہیں اور یہ ادارے آنے والی نسلوں کو بااختیار بنانے میں کلیدی کردار ادا کریں گے۔

صوبائی وزیر نے مزید کہا کہ 2022 کے تباہ کن سیلاب سے متاثرہ خاندانوں میں تعمیر شدہ گھروں کے سرٹیفکیٹس کی تقسیم وزیراعظم کی جانب سے متاثرین کے زخموں پر مرہم رکھنے اور انہیں باعزت زندگی کی طرف واپس لانے کی عملی کوشش ہے۔ انہوں نے کہا کہ یہ اقدام اس بات کا ثبوت ہے کہ موجودہ وفاقی حکومت مشکل وقت میں بلوچستان کے عوام کو تنہا نہیں چھوڑتی۔میر سلیم احمد کھوسہ نے وزیراعظم شہباز شریف کی قیادت کو سراہتے ہوئے کہا کہ بلوچستان کی ترقی، انفراسٹرکچر کی بہتری، تعلیم، صحت اور عوامی فلاح کے منصوبے حکومت کی اولین ترجیحات میں شامل ہیں۔ انہوں نے اس عزم کا اظہار کیا کہ پاکستان مسلم لیگ (ن)بلوچستان کے عوام کے ساتھ مل کر ترقی اور خوشحالی کے اس سفر کو مزید آگے بڑھائے گی۔