آپریشن سوئفٹ ریٹارٹ کے 7 برس مکمل ، ایئر ہیڈ کوارٹرز اسلام آباد میں خصوصی تقریب

جمعہ 27 فروری 2026 21:42

اسلام آباد (اُردو پوائنٹ اخبارتازہ ترین - این این آئی۔ 27 فروری2026ء) سربراہ پاک فضائیہ ظہیر احمد بابر سدھو نے کہا ہے کہ 7 سال قبل پاک فضائیہ نے مؤثر جواب سے دشمن کے برتری کے زعم کو توڑ کر قابلِ اعتماد دفاعی توازن بحال کیا۔آپریشن سوئفٹ ریٹارٹ کے 7 برس مکمل ہونے پر ایئر ہیڈ کوارٹرز اسلام آباد میں خصوصی تقریب کا انعقاد کیا گیا۔پاک فوج کے شعبہ تعلقات (آئی ایس پی آر) کے مطابق تقریب سے خطاب کرتے ہوئے سربراہ پاک فضائیہ ظہیر احمد بابر سدھو نے کہا کہ پاکستان باوقار امن کا خواہاں ایک ذمہ دار ملک ہے، 7 سال قبل دشمن نے تاریکی میں پاکستان کی خودمختاری کو چیلنج کر کے غلط اندازہ لگایا۔

انہوںنے کہاکہ پاک فضائیہ کے دن کی روشنی میں دیے گئے مؤثر جواب نے برتری کے زعم کو توڑ کر قابلِ اعتماد دفاعی توازن بحال کیا، 2021ئسے مالی دباؤ کے باوجود پاک فضائیہ کی جامع جدید کاری اور انڈیجینائزیشن کا عمل جاری ہے۔

(جاری ہے)

انہوں نے کہا کہ پاک فضائیہ میں جدید جنگی اور معاون صلاحیتیں شامل کی گئی ہیں، جبکہ بغیر پائلٹ سسٹمز، الیکٹرانک وارفیئر، اسپیس اور سائبر اثاثے بھی شامل کیے گئے ہیں، مقامی سطح پر تیار کردہ ملٹی ڈومین کِل چین قائم کی گئی ہے۔

ایئر چیف نے اپنے خطاب میں مئی 2025ء کے معرکہ حق کا حوالہ دیتے ہوئے کہا کہ پاک فضائیہ نے اس دوران مکمل ملٹی ڈومین آپریشنز پہلی بار کامیابی سے انجام دیے۔انہوں نے کہا کہ پاک فضائیہ نے عددی برتری رکھنے والے دشمن کے خلاف دفاعی قوت کا عملی مظاہرہ کیا، پاک فضائیہ کو نیکسٹ جنریشن ایئر فورس میں تبدیل کرنے کا عمل تیزی سے جاری ہے اور جدید جنگی تقاضوں کے مطابق آپریشنل ڈاکٹرائن ازسرنو ترتیب دی گئی ہے۔ایئر چیف مارشل ظہیر احمد بابر سدھو نے کہا کہ مقامی طور پر تیار بغیر پائلٹ فضائی نظام اور الیکٹرانک وارفیئر صلاحیتیں فعال ہیں جبکہ خلائی اور سائبر وسائل کے مؤثر استعمال سے کثیرالجہتی آپریشنل صلاحیتوں کو مزید مضبوط بنایا گیا ہے۔