بہاول پور ،ضلع کی سطح پر ڈسٹرکٹ کوآرڈی نیشن کمیٹیاں تشکیل، مسلم لیگ ن اور ق لیگ کی نمائندگی بھی شامل، نوٹیفکیشن جاری

بہاول پور (اُردو پوائنٹ اخبارتازہ ترین - اے پی پی۔ 12 مارچ2026ء) ضلع کی سطح پر ڈسٹرکٹ کوآرڈی نیشن کمیٹیاں تشکیل دے دی گئیں، مسلم لیگ ن اور ق لیگ کی نمائندگی بھی شامل ہے، نوٹیفکیشن جاری کر دیا گیا۔ تفصیلات کے مطابق چیف سیکرٹری پنجاب زاہداخترزمان کے دستخطوں سے جاری کردہ نوٹیفکیشن کے مطابق ضلع بہاولپورمیں ڈسٹرکٹ کوآرڈی نیشن کمیٹی قائم کردی گئی جن کے ممبران میں وفاقی وزیر ریاض حسین پیرزادہ ممبر،ق لیگ کے رہنماء چوہدری طارق بشیر چیمہ ممبر،ایم این اے سمیع الحسن گیلانی ممبر، ایم این اے عثمان اویسی ممبر،ایم این اے ملک اقبال چنڑممبر،عامرشاہ ایم پی اے پاکستان پیپلزپارٹی، حسین احمدمدنی سابق ٹکٹ ہولڈرپاکستان پیپلزپارٹی،میاں محمد شعیب اویسی ایم پی اے ممبر، ایم پی اے محمد کاظم پیرزادہ ممبر،ایم پی اے چوہدری خالد محمود ججہ ممبر،ایم پی اے حسن عسکری شیخ ممبر،ایم پی اے صاحبزادہ ایم گزین عباسی ممبر،ایم پی اے ملک خالد محمود بابرممبر، ایم پی اے ظہیر اقبال چنڑممبر،ایم پی اے رانا محمد طارق ممبر،سابق ایم پی اے محمد افضل گل،ڈپٹی کمشنر بہاولپور کو سیکرٹری ڈسٹرکٹ کوآرڈینیشن کمیٹی مقرر کیاگیا جبکہ باقی آفیشل ممبران میں ڈسٹرکٹ پولیس آفیسر بہاولپور سمیت بجلی اور گیس سے متعلق تمام صوبائی محکموں اور وفاقی اداروں کے ضلعی نمائندے شامل ہیں۔

(جاری ہے)

کمیٹی کے قیام کامقصدعوامی بہبود/سروس ڈیلیوری سے متعلق مسائل کا نوٹس لینا اور متعلقہ سرکاری محکموں کی کارکردگی کا جائزہ لینا،انتظامیہ، گورننس اور قانون سے متعلق مسائل کا نوٹس لینا،صوبائی حکومت کے محکموں اور محکمہ پولیس سمیت ضلع میں تعینات افسران/ اہلکاروں کے خلاف شکایات کا جائزہ لینا،ضلع میں ضلعی ترقیاتی پروگرام کی نگرانی کرنا اور ضلعی ترقیاتی پیکجز کی شکل کو حتمی شکل دینا،ضلع کی سیکٹرل ترقیاتی ترجیحات کی نشاندہی اور تجویز کرنا شامل ہیں۔

نوٹیفکیشن کے مطابق حکومت کی حکمت عملی/سیکٹرل ترجیحات کمیٹی کا اجلاس بلایا جائے گا،ڈپٹی کمشنر/کمیٹی کے سکریٹری تمام اراکین کی فہرست حروف تہجی کی ترتیب میں تیار کریں گے اور برقرار رکھیں گے اور اس کے مطابق اس کی گردشی کنوینر شپ کو یقینی بنائیں گے۔ڈپٹی کمشنر/ سیکرٹری میٹنگ کے متعلقہ چیئر سے مشورہ کریں گے اور اجلاس کے وقت اور تاریخ کے بارے میں فیصلہ کریں گے جو باقاعدگی سے پندرہ دن کے بعد منعقد کیا جائے گا۔

عوامی نمائندے طے شدہ میٹنگ سے پہلے اگلی میٹنگ میں اٹھائے جانے والے مسائل/نکات کی نشاندہی کریں گے تاہم قابل ذکر شہری عوامی ریلیف، ڈیلیوری اور گورننس سے متعلق کوئی بھی مسئلہ اٹھا سکتے ہیں۔ڈپٹی کمشنر/کمیٹی کے سیکرٹری اس بات کو یقینی بنائیں گے کہ تمام اراکین کو میٹنگ کے ایجنڈے اور وقت،تاریخ کے بارے میں ایک معقول پیشگی اطلاع کے ذریعے آگاہ کیا جائے جبکہ گزشتہ اجلاس کے فیصلوں کی پیروی آئندہ اجلاس میں کی جائے گی۔نوٹیفکیشن میں ہدایت کی گئی ہے کہ تمام ممبران، ضلعی انتظامیہ کے افسران اور محکمانہ سربراہان خود میٹنگ میں حاضر ہوں گے وہ اپنے کسی نمائندوں کو اجلاس میں شرکت کیلئے نہیں بھیجیں گے۔\378