گورنر پنجاب نے کوٹ چھجی تا لنگر پھاٹک روڈ کا سنگ بنیاد رکھ دیا

پیر 27 اپریل 2026 10:58

اٹک (اُردو پوائنٹ اخبارتازہ ترین - اے پی پی۔ 27 اپریل2026ء) گورنر پنجاب سردار سلیم حیدر خان نے ایگزیکٹو ڈائریکٹر سی ایس آر (او جی ڈی سی ایل) عاطف غفور کے ہمراہ او جی ڈی سی ایل کے تعاون سے تعمیر ہونے والی اہم شاہراہ کوٹ چھجی تا لنگر پھاٹک روڈ کا باضابطہ سنگ بنیاد رکھ دیا۔کوٹ چھجی پہنچنے پر گورنر پنجاب کا والہانہ استقبال کیا گیا، جہاں کارکنوں اور عوام کی بڑی تعداد نے ان پر پھولوں کی پتیاں نچھاور کیں اور نعرے بازی کی۔

اس موقع پر ان کے ہمراہ صاحبزادہ سردار فیضان حیدر خان، امیدوارانِ صوبائی اسمبلی سید عاطف شاہ گیلانی، ملک امانت خان راول، ضلعی صدر پی پی پی ملک ریاست سدریال، ملک آصف علی ایڈووکیٹ، سی ایس آر آفیسر شجاع رحمان، ضلعی جنرل سیکرٹری نصیر خان جدون اور دیگر مقامی قائدین بھی موجود تھے۔

(جاری ہے)

افتتاحی تقریب سے خطاب کرتے ہوئے گورنر پنجاب سردار سلیم حیدر خان نے کہا کہ پسماندہ علاقوں کی ترقی اور عوام کو بنیادی سہولیات کی فراہمی ان کی سیاست کا محور ہے۔

انہوں نے کہا، "سڑکوں کا جال بچھانا کسی بھی علاقے کی معاشی ترقی کے لیے ناگزیر ہے اور آج عوام سے کیا گیا ایک اور وعدہ پورا ہو رہا ہے۔ گورنر پنجاب نے ضلع اٹک کے عوام کے لیے اہم اعلانات کرتے ہوئے بتایا کہ تحصیل جنڈ میں ڈائیلاسز سینٹر کے قیام کے لیے کوششیں آخری مراحل میں ہیں، جس سے گردوں کے مریضوں کو مقامی سطح پر علاج کی سہولت میسر آئے گی۔

مزید برآں انہوں نے اعلان کیا کہ ضلع اٹک کے نویں سے بارہویں جماعت تک کے تمام طلبا کو تعلیمی سرگرمیوں میں معاونت کے لیے لیپ ٹاپ فراہم کیے جائیں گے۔انہوں نے مزید کہا کہ پاکستان پیپلز پارٹی کی قیادت ہمیشہ عوامی خدمت پر یقین رکھتی ہے اور ہم اقتدار کو عوامی مسائل کے حل کا ذریعہ سمجھتے ہیں۔ تقریب سے سردار فیضان حیدر، سید عاطف شاہ گیلانی اور ملک ریاست سدریال نے بھی خطاب کیا۔ تقریب کے دوران سیکورٹی کے انتہائی سخت انتظامات کیے گئے تھے اور پولیس کی بھاری نفری تعینات رہی۔\378