Live Updates

ٹرمپ کا ایران کے جہازوں پر قبضے کو قزاقی قرار دینا اعتراف جرم ہے، ایرانی وزارت خارجہ

یہ کوئی زبان کی لڑکھڑاہٹ نہیں تھی ٹرمپ نے حوش وحواس میں بیان دیا، جب ایک ریاست کا سربراہ کھلے عام ایسے اقدامات کو قزاقی سے تشبیہ دیتا ہے تو اس کا مطلب ہے کہ وہ عالمی اصولوں کی کوئی پرواہ نہیں کرتا؛ ترجمان

ساجد علی اتوار 3 مئی 2026 14:20

ٹرمپ کا ایران کے جہازوں پر قبضے کو قزاقی قرار دینا اعتراف جرم ہے، ایرانی ..

تہران (اُردو پوائنٹ اخبارتازہ ترین۔ 03 مئی2026ء) تہران اور واشنگٹن کے درمیان جاری لفظی جنگ میں اس وقت شدت آ گئی ہے، ایرانی وزارتِ خارجہ نے امریکی صدر کے ایک حالیہ بیان کو بنیاد بنا کر سخت تنقید کی ہے۔ غیر ملکی خبر رساں ادارے سے گفتگو کرتے ہوئے ایرانی وزارتِ خارجہ کے ترجمان اسماعیل بقائی نے امریکی صدر کے بحری جہازوں سے متعلق حالیہ بیان پر سخت ردِعمل دیتے ہوئے اسے بین الاقوامی قوانین کی کھلی خلاف ورزی کا اعتراف قرار دیا ہے، ان کا کہنا ہے کہ امریکہ کا طرزِ عمل عالمی بحری قوانین کے بجائے سمندری قزاقوں جیسا ہو چکا ہے، امریکی صدر کی جانب سے ایرانی بحری جہازوں پر قبضے کو قزاقی قرار دینا محض اتفاقی بات یا زبان کی لڑکھڑاہٹ نہیں تھی۔

انہوں نے کہا کہ یہ بیان اس افسوسناک حقیقت کا کھلا اعتراف ہے کہ امریکہ بین الاقوامی سمندری حدود میں مجرمانہ سرگرمیوں میں ملوث ہے اور عالمی تجارت و بحری سفر کو غیر محفوظ بنا رہا ہے، جب ایک ریاست کا سربراہ کھلے عام ایسے اقدامات کو قزاقی سے تشبیہ دیتا ہے تو اس کا مطلب ہے کہ وہ عالمی اصولوں کی کوئی پرواہ نہیں کرتا۔

(جاری ہے)

ایرانی وزارتِ خارجہ کی جانب سے اقوامِ متحدہ کے سیکرٹری جنرل سے مطالبہ کیا گیا ہے کہ وہ امریکہ کی جانب سے بین الاقوامی قانون کی اس کھلی خلاف ورزی کا نوٹس لیں، بین الاقوامی برادری امریکی اقدامات کو معمول بنانے کی کوششوں کو سختی سے مسترد کرے، کیونکہ یہ عالمی امن اور بحری سلامتی کے لیے سنگین خطرہ ہے۔

یاد رہے کہ حالیہ برسوں میں امریکہ اور ایران کے درمیان کھلے سمندروں میں بحری جہازوں اور تیل کے ٹینکروں کو قبضے میں لینے کے کئی واقعات پیش آ چکے ہیں، امریکہ ان کارروائیوں کو پابندیوں کے نفاذ کا حصہ قرار دیتا ہے، جبکہ ایران انہیں بین الاقوامی قزاقی اور چوری قرار دیتا ہے، تہران کا تازہ ترین بیان واشنگٹن پر سفارتی دباؤ بڑھانے کی ایک کڑی ہے تاکہ عالمی سطح پر امریکہ کے ان اقدامات کی مذمت کی جا سکے۔