چارسدہ میں دہشتگرد حملہ، مولانا محمد ادریس کی شہادت پر چوہدری شجاعت حسین کی شدید مذمت، قومی سانحہ قرار دے دیا

منگل 5 مئی 2026 20:22

اسلام آباد(اُردو پوائنٹ اخبارتازہ ترین - آن لائن۔ 05 مئی2026ء) اسلام آباد میں پاکستان مسلم لیگ کے سربراہ و سابق وزیراعظم چوہدری شجاعت حسین نے چارسدہ میں جمعیت علمائے اسلام (ف) کے رہنما اور سابق ایم پی اے مولانا محمد ادریس پر ہونے والے مبینہ دہشتگرد حملے کی شدید الفاظ میں مذمت کرتے ہوئے واقعے کو قومی سانحہ قرار دیا ہے۔چوہدری شجاعت حسین نے مولانا محمد ادریس کی شہادت پر گہرے دکھ اور افسوس کا اظہار کیا اور ان کے اہلخانہ سے دلی تعزیت و ہمدردی کا اظہار کرتے ہوئے کہا کہ وہ اس غم کی گھڑی میں برابر کے شریک ہیں۔

انہوں نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور لواحقین کو صبر جمیل دے۔اپنے بیان میں انہوں نے کہا کہ مولانا محمد ادریس کا جرات مندانہ اور اصولی موقف دراصل پوری قوم کی آواز تھا۔

(جاری ہے)

ان کے مطابق ملک دشمن عناصر ہمیشہ ایسے افراد کو نشانہ بناتے ہیں جو پاکستان کے استحکام اور امن کے لیے کردار ادا کر رہے ہوں۔

چوہدری شجاعت حسین نے جمعیت علمائے اسلام (ف) کے سربراہ مولانا فضل الرحمن، جامعہ حقانیہ کے اساتذہ اور طلبہ سے بھی اظہارِ تعزیت کیا اور ان کے ساتھ مکمل یکجہتی کا اظہار کیا۔انہوں نے مطالبہ کیا کہ اس حملے میں ملوث عناصر کو جلد از جلد گرفتار کر کے قانون کے کٹہرے میں لایا جائے تاکہ انصاف کے تقاضے پورے ہو سکیں۔انہوں نے اس واقعے میں زخمی ہونے والے دو پولیس اہلکاروں کی جلد صحتیابی کے لیے بھی دعا کی اور ان کی خدمات کو خراجِ تحسین پیش کیا۔