پیرزادہ محمد محمد اقبال شاہ کے وزیراعظم کا میڈیا ایڈوائزربننے پرلیسواہ وادی میں خوشی کا لہر دوڑ گئی

منگل 12 مئی 2026 14:55

نیلم (اُردو پوائنٹ اخبارتازہ ترین - این این آئی۔ 12 مئی2026ء) وزیراعظم آزاد جموں و کشمیر چوہدری فیصل ممتاز راٹھور کی جانب سے سینئر صحافی، ممتاز سیاسی و سماجی شخصیت اور پاکستان پیپلز پارٹی کے دیرینہ کارکن پیرزادہ محمد اقبال شاہ کو میڈیا ایڈوائزر مقرر کیے جانے پر ضلع نیلم بھر خصوصاً لیسواہ وادی میں خوشی کی لہر دوڑ گئی۔ پارٹی کارکنان، صحافتی حلقوں، سماجی شخصیات اور عوامی نمائندوں کی جانب سے اس تقرری کا بھرپور خیر مقدم کیا جا رہا ہے جبکہ مختلف علاقوں میں مبارکباد اور جشن کا سماں دیکھنے میں آیا۔

پاکستان پیپلز پارٹی کے کارکنان نے پیرزادہ محمد اقبال شاہ کی تقرری کو ایک کارکن دوست، مدبر اور مثبت فیصلہ قرار دیتے ہوئے کہا کہ انہوں نے طویل عرصہ تک صحافت، عوامی خدمت اور پارٹی کے لیے گراں قدر خدمات انجام دیں۔

(جاری ہے)

کارکنان کے مطابق وزیراعظم آزاد کشمیر چوہدری فیصل ممتاز راٹھور اور موسٹ سینئر وزیر میاں عبد الوحید ایڈووکیٹ نے ایک باصلاحیت، باوقار، نظریاتی اور تجربہ کار شخصیت پر اعتماد کر کے بہترین فیصلہ کیا ہے۔

لیسواہ وادی سمیت مختلف علاقوں میں سیاسی، سماجی اور صحافتی شخصیات نے پیرزادہ محمد اقبال شاہ کو مبارکباد پیش کرتے ہوئے اس امید کا اظہار کیا کہ وہ بطور میڈیا ایڈوائزر حکومت اور میڈیا کے درمیان مضبوط روابط کے فروغ، عوامی مسائل کو اجاگر کرنے اور حکومت کے مثبت تشخص کو مؤثر انداز میں پیش کرنے میں اہم کردار ادا کریں گے۔صحافتی حلقوں نے بھی اس تقرری کو خوش آئند قرار دیتے ہوئے کہا کہ پیرزادہ محمد اقبال شاہ صحافت کے میدان میں وسیع تجربہ رکھتے ہیں اور ان کی تقرری سے حکومت اور میڈیا کے تعلقات مزید مستحکم ہوں گے۔

مقررین نے اس موقع پر وزیراعظم آزاد کشمیر چوہدری فیصل ممتاز راٹھور اور موسٹ سینئر وزیر میاں عبد الوحید ایڈووکیٹ کی قیادت پر مکمل اعتماد کا اظہار کرتے ہوئے کہا کہ موجودہ حکومت خطے کی تعمیر و ترقی، عوامی فلاح و بہبود اور نوجوانوں کے روشن مستقبل کے لیے سنجیدہ اقدامات کر رہی ہے۔یاد رہے کہ پیرزادہ محمد اقبال شاہ پاکستان پیپلز پارٹی کے مرکزی عہدیداران میں شمار ہوتے ہیں اور شہید محترمہ بے نظیر بھٹو اور چیئرمین بلاول بھٹو زرداری کے قریبی ساتھیوں میں بھی شامل رہے ہیں۔ سیاسی و عوامی حلقوں کا کہنا ہے کہ ان کی تقرری سے نہ صرف پارٹی کارکنان کے حوصلے بلند ہوئے ہیں بلکہ حکومت اور میڈیا کے درمیان رابطہ کاری کے نظام میں بھی مزید بہتری آئی-