ملک میں معاشی سرگرمیوں کو تیز کرنے کیلئے ریگولیٹری اصلاحات ناگزیر ہیں، صدر اسلام آبادچیمبر

جمعرات 14 مئی 2026 20:43

اسلام آباد (اُردو پوائنٹ اخبارتازہ ترین - اے پی پی۔ 14 مئی2026ء) اسلام آباد چیمبر آف کامرس اینڈ انڈسٹری کے صدر سردار طاہر محمود نے کہا ہے کہ کاروبار کرنے میں آسانی کو بہتر بنانے، طریقہ کار کی رکاوٹوں کو دور کرنے اور ملک میں معاشی سرگرمیوں کو تیز کرنے کے لیے ریگولیٹری اصلاحات ناگزیر ہیں۔جمعرات کو یہاں چیمبر ہائوس میں دورے پر آئے ہوئے تاجروں سے گفتگو کرتے ہوئے انہوں نے زور دیا کہ طریقہ کار کو آسان بنانا، پالیسی میں تسلسل کو یقینی بنانا اور ڈیجیٹل گورننس کو فروغ دینا سرمایہ کاروں کا اعتماد بحال کرنے اور کاروبار کو آسان بنانے کے لیے ضروری ہے۔

سردار طاہر محمود نے حکومت سے مطالبہ کیا کہ وہ کاروبار دوست اصلاحات متعارف کرائے اور ون ونڈو آپریشنز کو مضبوط کرے۔

(جاری ہے)

سینئر نائب صدر طاہر ایوب نے کہا کہ نجی شعبہ معاشی ترقی میں زیادہ موثر کردار ادا کر سکتا ہے ،اگر اسے شفاف اور موثر ریگولیٹری فریم ورک فراہم کیا جائے۔ انہوں نے غیر ضروری معائنوں کو کم کرنے، ٹیکس نیٹ کو توسیع دینے اور کاروبار سے متعلقہ مسائل کے فوری حل کو یقینی بنانے کی ضرورت پر زور دیا۔

نائب صدر محمد عرفان چوہدری نے کہا کہ کاروبار کرنے میں آسانی سرمایہ کاری کو راغب کرنے اور عالمی سطح پر صنعتی ترقی کو فروغ دینے کا ایک اہم عنصر بن گیا ہے۔ انہوں نے زور دیا کہ پاکستان کو جدید ریگولیٹری طریقوں کو اپنانا چاہیے جبکہ کارکردگی اور مسابقت کو بہتر بنانے کے لیے ڈیجیٹلائزیشن کی حوصلہ افزائی کرنی چاہیے۔آئی سی سی آئی کی قیادت نے اس بات کا اعادہ کیا کہ تاجر برادری ان اصلاحات کو فروغ دینے کے لیے حکومت کے ساتھ تعاون کرنے کے لیے تیار ہے جو پاکستان میں سرمایہ کاری، انٹرپرینیورشپ، برآمدات اور پائیدار اقتصادی ترقی میں معاونت کرتی ہیں۔