کراچی میں نئی یونیورسٹیاں اور کالجز کا قیام ضروری ہے،چیئرمین مہاجر قومی موومنٹ

اگراس بار بھی امتحانی نتائج میرٹ کے بجائے متعصب حکومت کی پالیسی کے مطابق خراب کئے گئے تو شدید ردعمل آئیگا، آفاق احمد

جمعہ 15 مئی 2026 20:30

کراچی (اُردو پوائنٹ اخبارتازہ ترین - این این آئی۔ 15 مئی2026ء) چیئر مین آفاق احمد نے انٹرمیڈیٹ کے امتحانی مراکز پر طلبا اور انکے والدین کو ٹھنڈے پانی اور جوسزکی فراہمی اور طلبا کے والدین کیلئے شدید گرمی میں ٹینٹ لگا کر کرسیوں کا انتظام کرنے پر مہاجر قومی موومنٹ کے رضا کاروں کو خراج تحسین پیش کرتے ہوئے کہا کہ یہ طلبا میری قوم اور پاکستان کامستقبل ہیں اگراس بار بھی امتحانی نتائج میرٹ کے بجائے متعصب حکومت کی پالیسی کے مطابق خراب کئے گئے تو شدید ردعمل آئیگا۔

آفاق احمد نے کہا کہ کراچی کی بڑھتی ہوئی آبادی کی وجہ سے میٹرک اور انٹر کے طلبا کی تعداد میں بھی ریکارڈ اضافہ ہوا ہے، لیکن اس شہر میں 18سال سے حکومت پر قابض پیپلز پارٹی نے سندھ میں نئی یونیورسٹیاں اور کالج قائم کئے لیکن کراچی میں کوئی نئی یونیورسٹی یا کالج قائم نہیں ہونے دیا، حکومت نے کالج اور یونیورسٹز کی کمی کو پورا کرنے کے بجائے موجودہ یونیورسٹی اور کالجز میں موجود گنجائش کے مطابق طالبہ کو پا س کرنے کی حکمت عملی بنارکھی ہے،جو کراچی کے نوجوانوں کا تعلیمی قتل عام ہے۔

(جاری ہے)

آفاق احمد نے کہا کہ اس وقت ہنگامی بنیادوں پر کراچی میں نئی یونیورسٹیوں اور کالجز کے قیام کی ضرورت ہے،تاکہ باصلاحیت نوجوانو ں کو جو قوم و ملک کا سر مایہ ہیں بیرونِ ملک جانے سے روکا جاسکے۔آفا ق احمد نے کہا کہ اس مقصد کے حصول کیلئے مقتدر حلقوں کو اسہی طرح پیپلز پارٹی کی حکومت کو مجبور کرنا ہوگا،جس طرح دانش اسکول ااور خصوصی معاشی زون کراچی میں بنانے کیلئے مجبور کیا۔ آفا ق احمد کہاکہ عوام کو یہ نہیں بھولنا چاہیے کہ انکے اوپر ہونے والے ہر ظلم کے پیچھے پیپلزپارٹی کے ساتھ کراچی سے فارم 47کے زریعے ٹھنڈے ایوانوں میں پہنچائے جانے والے نام نہاد نما ئندے بھی ہیں۔