Live Updates

وفاقی بجٹ 2026/27: پیپلز پارٹی کا بجٹ میں حکومت کا ساتھ دینے اور حق میں ووٹ ڈالنے کا فیصلہ

/پی پی پی کے ترقیاتی منصوبے وفاقی بجٹ کا حصہ بنیں گی؛ مذاکراتی کمیٹی کے ٹھوس مؤقف کے بعد حکومت اور پیپلز پارٹی میں اتفاق

بدھ 3 جون 2026 20:20

خ*اسلام آباد (اُردو پوائنٹ اخبارتازہ ترین - آن لائن۔ 03 جون2026ء) وفاقی بجٹ برائے مالی سال 2026-27 کے معاملے پر سیاسی منظر نامے سے اہم ترین پیش رفت سامنے آئی ہے۔ ذرائع کے مطابق پاکستان پیپلز پارٹی (پی پی پی) نے وفاقی بجٹ کی منظوری میں حکومت کا بھرپور ساتھ دینے کا حتمی فیصلہ کر لیا ہے اور پارٹی بجٹ سیشن کے دوران حکومت کے حق میں ووٹ دے گی۔ذرائع کا کہنا ہے کہ دونوں جماعتوں کے درمیان ہونے والے مذاکرات کامیابی سے ہمکنار ہوئے ہیں، جس کے بعد وفاقی حکومت نے پیپلز پارٹی کے تجویز کردہ ترقیاتی منصوبوں کو آئندہ مالی سال کے بجٹ کا حصہ بنانے پر آمادگی ظاہر کر دی ہے۔

اس اقدام سے صوبہ سندھ سمیت دیگر علاقوں میں جاری عوامی فلاح و بہبود کے منصوبوں کو بروقت فنڈز کی فراہمی ممکن ہو سکے گی۔

(جاری ہے)

اس سے قبل بجٹ کے نکات اور عوامی ریلیف پر پیپلز پارٹی کے تحفظات کو دور کرنے کے لیے پارٹی کی اعلیٰ قیادت اور سینئر رہنماؤں پر مشتمل کمیٹی نے حکومت کے سامنے بھرپور مؤقف اختیار کیا۔ ذرائع کے مطابق وزیر اعلیٰ سندھ سید مراد علی شاہ، سید نوید قمر، سلیم مینڈوی والا، سینیٹر شیری رحمان اور سابق وزیراعظم راجا پرویز اشرف نے مذاکرات کے دوران پارٹی کا کیس مضبوطی سے لڑا۔

کمیٹی نے ملکی معاشی استحکام، غریب پرور پالیسیوں اور صوبائی منصوبوں کے تحفظ کے لیے حکومت کے سامنے ٹھوس تجاویز رکھیں۔ وفاقی حکومت اور پیپلز پارٹی کے درمیان ان اہم امور پر اصولی اتفاق ہو جانے کے بعد بجٹ کی منظوری کی راہ میں حائل تمام سیاسی رکاوٹیں دور ہو گئی ہیں، اور اب پیپلز پارٹی پارلیمنٹ میں بجٹ دستاویز کو پاس کروانے کے لیے حکومت کے شانہ بشانہ کھڑی ہوگی