Live Updates

پاک، سعودیہ، ترکیہ دفاعی معاہدہ امت مسلمہ کی وحدت و مشترکہ سلامتی کو مضبوط کریگا‘حافظ طاہر اشرفی

امت مسلمہ کی وحدت، سلامتی اور استحکام وقت کی اہم ترین ضرورت ہے‘ چیئرمین پاکستان علماء کونسل

ہفتہ 8 اگست 2026 23:00

لاہور (اُردو پوائنٹ اخبارتازہ ترین - این این آئی۔ 08 اگست2026ء) انٹرنیشنل تعظیم حرمین شریفین کونسل کے سیکرٹری جنرل و چیئرمین پاکستان علما ء کونسل حافظ طاہر محمود اشرفی نے کہا ہے کہ انٹرنیشنل تعظیم حرمین شریفین کونسل کے تمام اکابرین پاکستان، مملکت سعودی عرب اور ترکیہ کے درمیان ہونے والے دفاعی معاہدے کو قانل تعریف قرار دیتے ہیں اور سمجھتے ہیں کہ یہ معاہدہ امتِ مسلمہ کی وحدت و اتحاد اور مشترکہ سلامتی کو مضبوط کرے گا۔

انہوں نے کہا کہ اس معاہدے کو فرقہ واریت یا کسی بھی قسم کی عصبیت کا رنگ دینے کی کوشش کرنے والے ناکام ہوں گے اور امت مسلمہ کی وحدت و اتحاد کا پرچم سربلند ہوگا۔حافظ طاہر محمود اشرفی نے کہا کہ پاکستان، مملکت سعودی عرب اور ترکیہ کی قیادت نے جس طرح عالم عرب و اسلام کو ایران کے ساتھ تصادم سے بچانے اور اسرائیلی سازشوں کو ناکام بنانے میں کردار ادا کیا، اسی طرح ان شا اللہ مستقبل میں بھی پاکستان، سعودی عرب، ترکیہ اور دیگر اسلامی ممالک کی قیادتیں باہمی تعاون سے امت کے اتحاد، سلامتی اور استحکام کے لیے اقدامات آگے بڑھائیں گی۔

(جاری ہے)

انہوں نے کہا کہ اسلامی ممالک کو کمزور اور غیر مستحکم کرنے والے انتہاپسند اور دہشت گرد تنظیموں کے نیٹ ورکس کے خلاف بھی مسلم ممالک کو مشترکہ اور مربوط حکمت عملی اختیار کرنا ہوگی۔امت مسلمہ کی وحدت، سلامتی اور استحکام وقت کی اہم ترین ضرورت ہے۔