مکہ مشترکہ دفاعی معاہدہ مسلم امہ کے اتحاد اور خطے میں پائیدار امن کی جانب اہم پیش رفت ہے ،شزا فاطمہ خواجہ

اتوار 9 اگست 2026 17:42

اسلام آباد (اُردو پوائنٹ اخبارتازہ ترین - اے پی پی۔ 09 اگست2026ء) وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے مکہ مشترکہ دفاعی معاہد ہ کے حوالہ سے کہا ہے کہ یہ معاہدہ مسلم امہ کے اتحاد اور خطے میں پائیدار امن کی جانب اہم پیش رفت ہے۔ وزارت آئی ٹی و ٹیلی کمیونیکیشن کی جانب سے جاری بیان میں شزا فاطمہ خواجہ نے کہا کہ تاریخی مکہ معاہدے سے مسلم امہ کے لیے امن، اتحاد اور باہمی تعاون کی نئی راہیں ہموار ہوں گی۔

انہوں نے کہا کہ مکہ معاہدہ آنے والی نسلوں کے لیے اتحاد، اعتماد اور مشترکہ امن کی نئی امید بنے گا۔ شزا فاطمہ خواجہ نے مکہ معاہدے پر وزیراعظم محمد شہباز شریف، ولی عہد محمد بن سلمان اور صدر رجب طیب اردوان کی قیادت کو خراجِ تحسین پیش کرتے ہوئے کہا کہ بصیرت افروز قیادت قوموں کو قریب لاتی اور امن کی نئی راہیں کھولتی ہے۔

(جاری ہے)

وفاقی وزیر نے وزیراعظم محمد شہباز شریف اور فیلڈ مارشل سید عاصم منیر کی کاوشوں پر پوری قوم کی جانب سے اظہارِ تشکر کرتے ہوئے کہا کہ عسکری و سیاسی قیادت کی کاوشوں سے پاکستان کو عالمی سطح پر امن کے علمبردار کا نیا وقار حاصل ہوا ہے۔

انہوں نے کہا کہ مکہ معاہدہ کے تحت کسی ایک رکن ملک پر حملہ تمام رکن ممالک پر حملہ تصور ہوگا۔ وفاقی وزیر شزا فاطمہ خواجہ نے کہا کہ مکہ معاہدہ سے مسلم امہ میں اتحاد، عزم اور امید کی نئی لہر پیدا ہوئی ہے۔