ادارہ تدریس القرآن کے طلبہ صلاحیتوں میں کسی سے کم نہیں، رکن صوبائی اسمبلی شہلا بانو

پیر 10 اگست 2026 20:04

ایبٹ آباد (اُردو پوائنٹ اخبارتازہ ترین - اے پی پی۔ 10 اگست2026ء) رکن خیبرپختونخوااسمبلی سیدہ شہلا بانو نے کہا ہے کہ ادارہ تدریس القرآن یتیم خانہ ایبٹ آباد کے بچے صلاحیتوں میں کسی سے کم نہیں، ان کی رہنمائی اور سرپرستی کرنے سے ڈاکٹر، انجینئرز بن سکتے ہیں ، معاشرے کا ہر فرد اپنی ذمہ داری سمجھ کر کردار ادا کرے۔آزادی کی قدرو قیمت مقبوضہ کشمیر اور فلسطین کے مسلمانوں سے پوچھیں قائد اعظم محمد علی جناح کی والہانہ قیادت میں علیحدہ ملک ملا، اس کو ایٹمی طاقت میاں نواز شریف نے بنایا محسنین پاکستان کو ہمیشہ یاد رکھیں ۔

ان خیالات کا اظہار انہوں نے یہاں ادارہ تدریس القرآن یتیم خانہ ایبٹ آباد کے بچوں کے ساتھ جشن آزادی کی مناسبت تقریب سے خطاب کرتے ہوئے کیا ۔اس موقع پر چیئرمین ادارہ ملک ساجد اعوان نے بھی خطاب کیا۔

(جاری ہے)

ایم پی اے سیدہ شہلا بانو کا کہناتھاکہ والد کے سایہ سے محروم بچوں کی کفالت معاشرہ کی مشترکہ ذمہ داری ہے، بچے تعلیم کو ترجیحات میں رکھ کے جذبہ اور لگن سے آگے بڑھیں، ایک دن ملک کی خدمت میں پیش پیش ہوں گے ۔

انہوں نے کہا کہ 14 اگست کی خوشیاں منانے میں ان بچوں کے ساتھ مل کر اچھا لگا ہے ۔سیدہ شہلا بانو نے کہا کہ پاکستان کی ترقی کے راستے روشن اور ہموار کرنے کے لئے تعلیم واحد ذریعہ ہے ۔انہوں نے کہا کہ میاں محمد نواز شریف نے بھارت کے پانچ دھماکوں کے جواب میں چھ دھماکے کرکے پاکستان کو عسکری محاذ پر مضبوط بنایا ، افواج پاکستان کی قربانیوں کو بھی قدر کی نگاہ سے دیکھتے ہیں ۔

ایم پی اے جشن آذادی کی مناسبت سے بچوں کے ساتھ گھل مل گئیں اور یوم آزادی کی مناسبت سے جھنڈیاں بھی لہرائی گئیں۔ چیئرمین ادارہ تدریس القرآن ملک ساجد اعوان نے ادارہ کی کارکردگی پر روشنی ڈالی جس پر ایم پی اے نے انہیں خراج تحسین پیش کیا ۔تقریب کے اختتام پر جشن آزادی کی مناسبت سے کیک بھی کاٹا گیا اور بچوں میں تحائف بھی تقسیم کئے گئے ۔