پنجاب کا گلگت بلتستان کے طلباء کیلئے 6 کروڑ سے زائد مالیت کی سکالرشپ کا تحفہ

منگل 11 اگست 2026 18:25

لاہور (اُردو پوائنٹ اخبارتازہ ترین - اے پی پی۔ 11 اگست2026ء) وزیر تعلیم پنجاب رانا سکندر حیات نے کہا ہے کہ پنجاب حکومت نے صوبائی حدود سے نکل کر اپنے تعلیمی وسائل پورے پاکستان کے نوجوانوں کیلئے وقف کر رکھے ہیں، ماضی کی سیاست نے نوجوانوں کو وعدے اور نعرے دیئے جبکہ پنجاب حکومت نوجوانوں کو ان کا حق دے رہی ہے۔ قراقرم انٹرنیشنل یونیورسٹی میں جی بی کے500 طلبا میں6 کروڑ سے زائد مالیت کی سکالرشپ تقسیم کرنے کی تقریب سے خطاب کرتے ہوئے رانا سکندر حیات نے مزید کہا کہ ماضی کے حکمرانوں نے نوجوانوں کے نام پر بہت سیاست کی لیکن ان کے مستقبل کیلئے عملی وسائل فراہم نہیں کر سکے۔

انہوں نے کہا کہ آج گلگت کے نوجوانوں کیلئے پنجاب صرف سکالرشپ نہیں بلکہ محبت، اعتماد اور تعلیمی شراکت داری کا پیغام لے کر آیا ہے۔

(جاری ہے)

گلگت بلتستان کے طلبا کیلئے6 کروڑ روپے سے زائد کی سکالرشپس وزیر اعلی پنجاب کا خصوصی تحفہ ہے۔ گلگت کے نوجوانوں کی فرمائش پر وزیر تعلیم نے جلد لیپ ٹاپ بھجوانے کا بھی اعلان کیا اور کہا کہ وزیر اعلی پنجاب سے جی بی کے نوجوانوں کیلئے لیپ ٹاپ کی منظوری لے کر جلد لیپ ٹاپ بھجوائے جائیں گے۔

انہوں نے گلگت کے طلباء کیلئے1000 گوگل کیرئیر سکالرشپ کا بھی اعلان کیا اور کہا کہ گلگت بلتستان کے نوجوانوں کو ہزاروں ڈالر کے گوگل سرٹیفیکیشن کورسز مفت کروائیں گے۔ وزیر تعلیم نے کہا کہ پنجاب حکومت تعلیم کو صوبائی سیاست کی دیواروں میں قید رکھنے کی حامی نہیں۔ پنجاب کے وسائل اور تعلیمی منصوبے ہر صوبے کے میرٹ پر پورا اترنے والے نوجوانوں کیلئے ہیں۔

انہوں نے کہا کہ نوجوانوں کو صوبوں، علاقوں اور سیاسی وابستگی کی بنیاد پر تقسیم کرنے کی سیاست نے ملک کو بہت نقصان پہنچایا ہے۔ انہوں نے کہا کہ پنجاب کے ہونہار سکالرشپ پروگرام میں ملک کے دیگر صوبوں کے طلبا کیلئے بھی کوٹہ مختص کیا گیا ہے۔ سندھ، بلوچستان اور خیبرپختونخوا کے طلبا پنجاب حکومت کے تعلیمی منصوبوں سے مستفید ہو رہے ہیں، آئندہ چند دنوں میں سکالرشپ کا تحفہ لے کر آزاد کشمیر بھی جا رہے ہیں۔

انہوں نے کہا کہ گلگت بلتستان میں آج کا پروگرام اس عزم کا عملی ثبوت ہے کہ پنجاب حکومت پاکستان کے ہر خطے کے نوجوانوں کو ترقی کے سفر میں ساتھ لے کر چلنے پر یقین رکھتی ہے۔ رانا سکندر حیات نے کہا کہ جی بی اور دیگر صوبوں کے نوجوانوں کیلئے پنجاب حکومت کا سکالرشپ پروگرام صرف مالی معاونت نہیں بلکہ قومی یکجہتی اور مساوی مواقعوں کی فراہمی کا عملی اعلان ہے۔