ملک بھر میں پاکستان کا 80 واں یومِ آزادی روایتی جوش و جذبے، ملی یگانگت اور منفرد انداز کے ساتھ منانے کا آغاز ہوگیا

جمعہ 14 اگست 2026 01:24

اسلام آباد (اُردو پوائنٹ اخبارتازہ ترین - اے پی پی۔ 14 اگست2026ء) ملک بھر میں رات کے12بجتے ہی پاکستان کا 80 واں یومِ آزادی روایتی جوش و جذبے، ملی یگانگت اور منفرد انداز کے ساتھ منانے کا آغاز ہوگیا۔اس پرمسرت موقع پر شاہراہوں، بازاروں اور تمام اہم سرکاری و نجی عمارتوں کو سبز ہلالی پرچموں، قومی پرچم کی رنگت کی لڑیوں اور برقی قمقموں سے دلکش انداز میں سجا دیا گیا ہے۔

وفاقی دارالحکومت اسلام آباد، کراچی، لاہور، پشاور اور کوئٹہ سمیت ملک کے کونے کونے میں ٹھیک رات 12 بجے آتش بازی کے شاندار مظاہرے کیے گئے، جس سے آسمان مختلف رنگوں کی روشنیوں سے نہلا اٹھا۔ آزاد پاکستان کی 79ویں سالگرہ کا استقبال کرنے کے لیے رات کے باقاعدہ آغاز پر ہی متعدد مقامات پر 79 پائونڈ کے قومی پرچم کے نقش و نگار والے کیک کاٹے گئے۔

(جاری ہے)

اس کے ساتھ ہی، نوجوانوں اور شہریوں کے مختلف گروہوں نے رات 12 بجتے ہی ریلیوں کا انعقاد کیا، جبکہ کئی مقامات پر پرچم کشائی کی خصوصی تقریبات منعقد کی گئیں جہاں قومی ترانے کی فضا میں گونج نے حاضرین کے جذبے کو دوچند کر دیا۔ مختلف شہروں میں بائیکرز اور کار ریلیوں کے شرکاء قومی پرچموں سے سجی گاڑیوں میں سڑکوں پر نکل آئے اور سائرن بجا کر آزادی کا جشن منایا، جبکہ نوجوانوں اور بچوں نے ملی نغموں پر قومی پرچم لہراتے ہوئے ملک سے اپنی محبت کا اظہار کیا۔ شہریوں نے بڑی تعداد میں اپنے اہل خانہ کے ساتھ رات گئے تک جاری رہنے والے ان جشن میں شرکت کی، جس سے ہر سو سبز و سفید رنگوں اور ملی جذبے کی بہار دکھائی دے رہی ہے۔