مولانا فضل الرحمان نے مشترکہ پارلیمانی کردار کیلئے’متحدہ اپوزیشن‘ بنانے کا اعلان کردیا

اپوزیشن جماعتوں کی جلد اےپی سی بھی بلائیں گے، پیپلزپارٹی شامل نہیں ہوسکتی وہ حکومت میں ہے، سربراہ جے یو آئی (ف)

ثنااللہ ناگرہ جمعرات 20 اگست 2026 18:46

مولانا فضل الرحمان نے مشترکہ پارلیمانی کردار کیلئے’متحدہ اپوزیشن‘ ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی۔ 20 اگست 2026ء ) سربراہ جےیوآئی ف مولانا فضل الرحمان نے متحدہ اپوزیشن کے قیام کا اعلان کر دیا۔ میڈیا کے مطابق قومی اسمبلی میں مولانا فضل الرحمان اور اپوزیشن لیڈر محمود اچکزئی سے اہم ملاقات ہوئی۔ جس میں دونوں رہنماؤں نے متحدہ اپوزیشن کے قیام کا اعلان کیا۔ سربراہ جے یو آئی (ف) نے میڈیا سے گفتگو میں کہا کہ سینیٹ اور قومی اسمبلی کے اپوزیشن لیڈران سے متحدہ اپوزیشن بنانے پر اتفاق ہوا ہے، ہم مشترکہ پارلیمانی کردار ادا کرنا چاہتے ہیں۔

انہوں نے کہا کہ مزید نشستیں ہوں گی امید ہے کہ اچھا آغاز ہوا ہے۔ مولانا فضل الرحمان نے پیپلزپارٹی سے متعلق سوال کے جواب میں کہا کہ وہ حکومت میں ہے، اپوزیشن جماعتوں کی اے پی سی کیلئے بھی ماحول بنانا چاہیے۔

(جاری ہے)

دوسری جانب پاکستان پیپلزپارٹی کے چیئرمین بلاول بھٹو زرداری نے قومی اسمبلی کے اپوزیشن چیمبر میں نیشنل اسمبلی کے قائد حزب اختلاف محمود خان اچکزئی اور سینیٹ میں اپوزیشن لیڈر علامہ راجہ ناصر عباس سے ملاقات کی۔

ملاقات کے موقع پر پاکستان تحریک انصاف کے سیکریٹری جنرل سلمان اکرم راجہ، تحریک تحفظ آئین پاکستان کے سیکریٹری جنرل اسد قیصر، تحریک تحفظ آئین پاکستان کے وائس چیئرمین مصطفی نواز کھوکھر، قومی اسمبلی میں پی ٹی آئی کے چیف وہپ عامر ڈوگر، رکن قومی اسمبلی عادل بازئی اور تحریک تحفظ آئین پاکستان کے ترجمان اخوندزادہ حسین بھی موجود تھے جبکہ چیئرمین بلاول بھٹو زرداری کے ہمراہ راجہ پرویز اشرف، شیری رحمان، نوید قمر اور ندیم افضل چن موجود تھے۔

چیئرمین بلاول بھٹو زرداری اور پارلیمان میں حزب اختلاف کے قائدین کے درمیان پارلیمانی امور اور ملکی سیاست پر تبادلہ خیال ہوا۔ چیئرمین بلاول بھٹو زرداری نے پارلیمان میں حزب اختلاف کے قائدین سے درخواست کی کہ وہ پارلیمانی کمیٹیوں میں شامل ہوکر فعال کردار ادا کریں، جس پر اپوزیشن رہنماؤں نے کہا کہ وہ پی ٹی آئی چیئرمین سے مشاورت کے بعد فیصلہ کریں گے۔

پاکستان پیپلزپارٹی اور قائدین حزب اختلاف نے پارلیمان میں قانون سازی کے حوالے سے رابطے بڑھانے پر اتفاق کیا۔پیپلز پارٹی کی قیادت نے پارلیمان میں حزب اختلاف کے قائدین سے کہا کہ آپ انتخابات میں شفافیت یقینی بنانے کے لئے انتخابی اصلاحات کے سلسلے میں پارلیمان میں اپنا کردار ادا کریں۔پیپلز پارٹی کی قیادت نے سپریم کورٹ کے فیصلے کے نتیجے میں عمران خان کی اسپتال منتقلی اور علاج کو خوش آئند قرار دیتے ہوئے کہا کہ یہ ایک جمہوری روایت ہے۔