سانحہ پمز،سینٹ میں پی پی پی اور پی ٹی آئی کا پر حکومتی تحقیقات پر عدم اعتماد کا اظہا ر

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔28 اگست ۔2026 ) پاکستان پیپلزپارٹی اور پاکستان تحریک انصاف (پی ٹی آئی ) نے پمز ہسپتال میں آتشزدگی کے واقعے پر حکومتی تحقیقات پر عدم اعتماد کا اظہارکردیا،پی ٹی آئی کے سینیٹر علی ظفر نے کہاہے کہ واقعے کی طویل مدتی وجوہات کا بھی جائزہ لینا ہو گا، سینیٹ کی کمیٹی قائم کی جائے جبکہ پیپلزپارٹی کی سینیٹر شیری رحمان نے کہا کہ معاملے کی تحقیقات کےلئے پورے ایوان کی کمیٹی بنائی جائے جو 40 دن میں رپورٹ پیش کرے.

(جاری ہے)

جمعہ کو سینیٹ اجلاس میں اظہار خیال کرتے ہوئے پی ٹی آئی کے سینیٹر علی ظفر نے پمز واقعے کی مکمل تحقیقات اور ذمے داروں کو سزا دینے کا مطالبہ کیا علی ظفر نے کہا کہ پمز واقعے کی مکمل تحقیقات کی جائیں اور تعین کیا جائے کہ اس واقعے کا ذمے دار کون تھا، جس کی غلطی تھی اسے سزا دی جائے. انہوں نے کہا کہ واقعے کی طویل مدتی وجوہات کا بھی جائزہ لینا ہو گا، ذمے داری وزیر اعظم، کابینہ اور بجٹ منظور کرنے والوں پر عائد ہوتی ہے علی ظفر کا کہنا ہے کہ ہم نے کہا تھا صحت کا بجٹ کم نہ کیا جائے، اس کا اثر غریبوں کے اسپتالوں پر پڑے گا، میں نے اپنی بجٹ تقریر میں بھی یہ بات کہی تھی لیکن حکومت نے اسے مسترد کردیا تھا.

انہوں نے کہا کہ ہسپتال حکومت کی ترجیحات میں شامل ہی نہیں ہیں سینیٹر علی ظفر نے مطالبہ کیا کہ پمز واقعے کی تحقیقات کےلئے سینیٹ کی کمیٹی قائم کی جائے اور اس کی سربراہی اپوزیشن کو دی جائے ان کا کہنا ہے کہ کمیٹی ہسپتالوں میں ہنگامی حالات سے نمٹنے کے لئے ایس او پیز تیار کرے اور موجودہ ایس او پیز کا بھی جائزہ لے. علی ظفر نے کہا کہ ہسپتالوں کو کمیٹی کے ساتھ تعاون کرنے کا پابند کیا جائے اور یہ کمیٹی آج ہی تشکیل دی جائے، حکومت کی جانب سے قائم کردہ کمیٹی پر عوام کو اعتماد ہی نہیں ہے دریں اثنا پی پی پی کی سینیٹر شیری رحمان نے پمز ہسپتال میں آتشزدگی کے واقعے پر حکومتی تحقیقات پر عدم اعتماد کا اظہار کرتے ہوئے مطالبہ کیا ہے کہ معاملے کی تحقیقات کے لئے پورے ایوان کی کمیٹی بنائی جائے جو 40 دن میں رپورٹ پیش کرے.

سینیٹ اجلاس میں اظہارِ خیال کرتے ہوئے شیری رحمان نے کہا کہ جو حکومتی کمیٹیاں بنائی گئی ہیں، ہمیں ان پر اعتماد نہیں، ان کمیٹیوں میں سب لوگ ایک دوسرے کی تحقیقات کر رہے ہیں، ساری تحقیقاتی کمیٹیوں کا کیا بنا، ہمیں بتایا جائے، ورنہ میں کارروائی نہیں چلنے دوں گی انہوں نے کہا کہ جھوٹ بولا جا رہا ہے کہ انخلا کے راستے کھلے تھے، سب راستے بند تھے، یہ بھی پوچھا جائے کہ عملہ کہاں تھا، عملہ سو رہا تھا، پمز کے پاس فائر این او سی کیوں نہیں تھا اور انخلا کے راستے کہاں بند تھے؟.

شیری رحمان نے کہا کہ سی ڈی اے کی رپورٹس پمز کی رپورٹس کے برعکس ہیں، سی ڈی اے نے متنبہ کیا تھا کہ ہسپتال کا فائر سیفٹی نظام درست نہیں، صرف سیکرٹری کو معطل کر دینا کافی نہیں، پمز میں آگ لگنے کے معاملے کا کیا بنا؟ بتایا جائے پیپلز پارٹی کی سینیٹر نے سوال اٹھایا کہ کبھی کسی نے ایئرکنڈیشنر سے چنگاری آتی دیکھی ہے؟ ہم بوڑھے ہو گئے ان میں بیٹھ کر انہوں نے اپنے سابقہ وزارت کے دور کا حوالہ دیتے ہوئے کہا کہ میں وزیر تھی جس دن اپنی وزارت میں مداخلت نہ روک سکی، مستعفی ہو گئی تھی، بطور وزیر صحت میں نے اپنے شوہر کا پمز میں آپریشن کروایا تھا، میں نے شوہر سے کہا تھا کہ کراچی میں نہیں، آپ کا آپریشن یہیں ہو گا.

شیری رحمان نے کہا کہ پمز کسی کو سروس دینے کے لائق نہیں، پمز اپنے آپریشنز پولی کلینک اور راولپنڈی کو ریفر کر رہا ہے انہوں نے بتایا کہ مجھے کہا گیا تھا کہ دروازے اس لئے بند ہیں کیونکہ بچے چوری ہوتے ہیں، میں نے کہا تھا دروازے بند نہ کریں، سیکیورٹی گارڈز لگا دیں. شیری رحمان نے کہا کہ عوام شہنشاہی سے تھک گئے ہیں، عوام آپ سے کوئی تعلق نہیں رکھتے، ایوان سے لوگوں کو امید نہیں کیونکہ یہاں کچھ نہیں ہو رہا انہوں نے مطالبہ کیا کہ سینیٹ کی کمیٹی بنائی جائے جو پمز کے معاملے کی تحقیقات کر کے 40 دن میں رپورٹ دے.