قائدِ اعظم اکادمی کراچی ، قائدِ اعظم مزار مینجمنٹ بورڈ و برکلن سیکنڈری سکول کے زیر اہتمام تقریب

جمعرات 10 ستمبر 2026 21:13

کراچی (اُردو پوائنٹ اخبارتازہ ترین - اے پی پی۔ 10 ستمبر2026ء) قائدِ اعظم محمد علی جناحؒ کی 150ویں یومِ ولادت کے سلسلے میں منائے جانے والے سال اور 61ویں یوم دفاع پاکستان کی مناسبت سے قائدِ اعظم اکادمی، قائدِ اعظم مزار مینجمنٹ بورڈ، قومی ورثہ و ثقافت ڈویژن، حکومتِ پاکستان اور برکلن سیکنڈری سکول کے زیر اہتمام مزارِ قائد کے آڈیو ویژول ہال میں فکر قائد اور یوم دفاع وطن کے عنوان سے تقریب کا انعقاد ہوا ۔

تقریب کے مہمان خصوصی ڈی آئی جی پی آر، کمانڈر (ریٹائرڈ)، سابق کمانڈنٹ پولیس ٹریننگ کالج سعید آباد، سید شوکت علی شاہ، مہمان اعزازی سید ندیم جیلانی، فصیح الدین خان، سلمان احمد صدیقی اور اظہار تشکر کرنے والوں میں ارشد ملک تھے۔اس موقع پر زاہد حسین ابڑو نے ابتدائی کلمات ادا کرتے ہوئے تقریب کے اغراض و مقاصد بیان کیے ۔

(جاری ہے)

قائدِ اعظم مزار مینجمنٹ بورڈ کے ریزیڈنٹ انجینئر عبد العلیم شیخ نے خطب استقبالیہ پیش کرتے ہوئے کہا کہ آج کی تقریب کا مقصد صرف بانی پاکستان قائد اعظم محمد علی جناح اور جنگ ستمبر 1965 کے شہداء کو خراجِ عقیدت پیش کرنا نہیں بلکہ وطن عزیز کے دفاع و استحکام کا جذبہ اپنے سینوں میں بھرپور پروان چڑھانا ہے۔

انہوں نے کہا کہ قائد اعظم کا تصور وطن محض جغرافیائی حدود تک محدود نہیں تھا ان کا وطن ایک ایسا نظریاتی کلچر تھا قانون کی حکمرانی ، جمہوریت کا فروغ، مساوی حقوق، آزادی، عدل و انصاف ہو۔ مقررین نے کہا کہ اس تقریب کے ذریعے ہمیں یہ پیغام دینا ہوگا کہ ہم سب ایک اور متحد ہیں، پائیدار امن چاہتے ہیں اور اس سلسلے میں قائد اعظم کے افکار کی روشنی میں وطن عزیز میں پائیدار امن، ترقی و استحکام کے لیے کسی قربانی سے دریغ نہیں کریں گے۔ تقریب کے اختتام پر معزز مہمانانِ گرامی اور مقررین کو یادگاری شیلڈز پیش کی گئیں اور طلبا و طالبات کو سرٹیفکیٹ دئیے گئے۔