ترکی نے ملک میں معلوماتی ویب سائٹ وکی پیڈیا پرپابندی عائد کردی

ترک حکام کی جانب سے انتظامی حکم آنے کے بعد وکی پیڈیا کو بلاک کیا گیا ، اس بندش سے ملک میں وکی پیڈیا کا مختلف زبانوں میں شائع ہونے والا کوئی بھی ایڈیشن انٹرنیٹ پر موجود نہیں ہے،مانیٹرنگ گروپ کا دعویٰ

ہفتہ 29 اپریل 2017 17:18

استنبول(اُردو پوائنٹ اخبار آن لائن۔ اتوار 30 اپریل 2017ء) انٹرنیٹ مانیٹرنگ گروپ نے دعویٰ کیا ہے کہ ترک حکام نے اپنے ملک میں معلوماتی ویب سائٹ وکی پیڈیا پرپابندی عائد کردی ہے۔غیرملکی میڈیا کے مطابق ترکی بلاکس نامی ایک انٹرنیٹ مانیٹرنگ گروپ نے اپنے بیان میں دعوی کیا کہ ترکی نے وکی پیڈیا پر پابندی عائد کردی ہے، تاہم پابندی کی اصل وجہ سامنے نہیں آسکی۔

ہفتے کی صبح ترکی میں انٹرنیٹ صارفین کو وکی پیڈیا کے کسی بھی صفحہ تک رسائی نہیں مل رہی تھی۔مانیٹرنگ گروپ نے دعوی کیا کہ ترک حکام کی جانب سے انتظامی حکم آنے کے بعد وکی پیڈیا کو بلاک کیا گیا ، اس بندش سے ملک میں وکی پیڈیا کا مختلف زبانوں میں شائع ہونے والا کوئی بھی ایڈیشن انٹرنیٹ پر موجود نہیں ہے۔

(جاری ہے)

ترکی بلاکس اور دیگر میڈیا رپورٹس کے مطابق اس معلوماتی ویب سائٹ کو عبوری انتظامی حکم کے تحت بند کیا گیا ہے تاہم اس کی مستقل بندش کے لیے اگلے چند روز میں عدالتی توثیق کی ضرورت ہوگی۔

دوسری جانب ترکی کی معلومات اور مواصلات ٹیکنالوجی اتھارٹی نے موقف اختیا ر کیا ہے کہ اس نے وکی پیڈیا پر پابندی عائد کی ہے تاہم اس کی تفصیلات نہیں بتائیں۔تاہم اتنا ضرور بتایا گیا کہ تکنیکی تجزیے اور قانونی غور و فکر کے بعد وکی پیڈیا کے خلاف یہ انتظامی اقدام اٹھایا گیا۔وکی پیڈیا کے علاوہ ترکی میں معروف سوشل میڈیا ویب سائٹس معمول کے مطابق چل رہی ہیں۔

واضح رہے کہ ترکی پچھلے کچھ برسوں سے معروف انٹرنیٹ ویب سائٹس کو اپنے ملک ہونے والے مظاہروں اور دہشتگردی کے واقعات کے پیش نظر بلاک کرنے کے حوالے سے خاصہ مقبول رہا ہے، ان ویب سائٹس میں فیس بک اور ٹوئٹر سر فہرست ہیں۔تاہم انٹرنیٹ صارفین وی پی این سروسز کا سہارا لے لیکر ان بلاک ویب سائٹس کو استعمال کرنے کی کوشش کرتے ہیں تاہم یہ شکایات بھی موصول ہورہی ہیں کہ اب وی پی این سروس بھی بند ہونا شروع ہوگئی ہے۔حکومت کا اس معاملے میں کہنا ہے کہ نیشنل سیکیورٹی کے پیش نظر اس طرح کے عبوری اقدامات کیے جاتے ہیں تاہم ناقدین اسے صدر طیب اردگان کی حکومت میں شہریوں کی آزادی پر ایک اور پابندی کی مانند دیکھتے ہیں۔