پولش سپریم کورٹ پر سیاستدانوں کا کنٹرول، متنازعہ قانون منظور

ملکی اپوزیشن کا بائیکاٹ،یورپی یونین کی تنقید،قانون منظورہوتے ہی ملک بھر میں مظاہرے شروع ہوگئے

جمعہ 21 جولائی 2017 12:22

وارسا(اُردو پوائنٹ اخبار آن لائن۔ ہفتہ 22 جولائی 2017ء)یورپی یونین کے رکن ملک پولینڈ میں سپریم کورٹ کا کنٹرول سیاستدانوں کو منتقل کر دینے کا ایک نیا لیکن بہت متنازعہ قانون منظور کر لیا گیا ہے۔ اس قانونی مسودے پر یورپی یونین اور ملکی اپوزیشن کی طرف سے شدید تنقید کی گئی ۔غیرملکی خبررساں ادارے کے مطابق ملکی اپوزیشن، یورپی یونین اور کئی یورپی ملکوں کے رہنما ء یہ کہتے ہی رہے کہ وارسا حکومت عدلیہ میں اصلاحات کے نام پر جو نیا قانون منظور کروانا چاہتی ہے، وہ دراصل بنیادی جمہوری اصولوں کے منافی ہو گا اور عدلیہ کی آزادی اور غیر جانبداری کو بری طرح متاثر کرے گا۔

لیکن وارسا میں پارٹی برائے قانون اور انصاف یا پی آئی ایس کی قدامت پسند حکومت نے، جس نے اس حوالے سے ایک مسودہ قانون پارلیمان کے ایوان زیریں میں پیش کر رکھا تھا، ہر طرح کی تنقید کو نظر انداز کرتے ہوئے اس بل پر رائے شماری کا فیصلہ کیا،رائے شماری میں ایوان زیریں کے 235 ارکان نے اس بل کے حق میں ووٹ دیا اور 192 نے اس کی مخالفت کی جبکہ 23 اراکین نے اپنی رائے محفوظ رکھی۔

(جاری ہے)

پولینڈ میں موجودہ حکمران پارٹی کو پارلیمان کے دونوں ایوانوں میں اکثریت حاصل ہے اور اب یہی قانون منظوری کے لیے ایوان بالا میں بھی پیش کر دیا جائے گا۔ حکومت اس بل کی ایوان بالا کی طرف سے منظوری میں بھی کوئی دیر نہیں کرنا چاہتی۔ اس قانونی مسودے کے خلاف پولینڈ کے مختلف شہروں میں عوام کئی روز تک احتجاجی مظاہرے کرتے رہے، اپوزیشن یہ کہتی رہی کہ یوں ملکی عدلیہ کسی بھی طور آزاد اور غیر جانبدار نہیں رہ سکے گی، جو کہ کسی بھی جمہوری معاشرے کی بنیاد قدر ہوتی ہے، اور یورپی یونین نے تو پولینڈ کو کئی بار یہ دھمکیاں بھی دی تھیں کہ اس قانون کی منظوری کی صورت میں برسلز کی طرف سے وارسا کے خلاف ایسی پابندیاں بھی لگائی جا سکتی ہیں، جو پہلے کبھی نہ لگائی گئی ہوں۔

یہ قانون اس لیے متنازعہ ہے کہ اس کے تحت سپریم کورٹ کے ججوں کی تعیناتی کے اختیارات اسی عدالت عظمیٰ کے پاس رہنے دینے کے بجائے ملکی وزیر انصاف کو منتقل کر دیے جائیں گے۔آئینی امور کے بہت سے پولستانی اور یورپی ماہرین اس بل کے قانونی حیثیت اختیار کر جانے کے بعد کی صورت حال کے حوالے سے خبردار کرتے ہوئے کہتے ہیں کہ سپریم کورٹ کے ججوں کی تعیناتی کا اختیار وزیر انصاف کو دینے کا مطلب یہ ہو گا کہ پولینڈ میں آئندہ اس اعلیٰ ترین ملکی عدالت کو سیاستدان ہی کنٹرول کریں گے، جس کا دوسرے لفظوں میں مطلب ’آزاد عدلیہ کا قتل‘ ہو گا۔

یہ متنازعہ قانونی بل وارسا میں یاروسلاو کاچنسکی کی پارٹی قیادت میں اقتدار میں آنے والی پی آئی ایس کی عوامیت پسند حکومت کے اس سیاسی منصوبے کا حصہ ہے، جس کے تحت پولستانی عدلیہ کی ہر سطح پر تنظیم نو کی جائے گی۔