ایم کیو ایم بہادر آباد کیمپ نے الیکشن کمیشن کو لکھا گیا خط واپس لینے کا اعلان کردیا

یہ فیصلہ قوم اور تنظیم کے اتحاد کے لیے کیا ہے، مجھ پر پارٹی پر قبضہ کرنے کا الزام لگایا جارہا ہے میں ساری زندگی کنوینر نہیں بنوں گا،عامر خان

ہفتہ 10 فروری 2018 21:33

کراچی(اُردو پوائنٹ اخبار آن لائن۔ ہفتہ 10 فروری 2018ء)ایم کیو ایم بہادر آباد کیمپ نے الیکشن کمیشن کو لکھا گیا خط واپس لینے کا بڑا اعلان کردیا، کہا یہ فیصلہ قوم اور تنظیم کے اتحاد کے لیے کیا ہے، پارٹی پر قبضہ اور سازش کے الزام سہنے والے عامر خان آبدیدہ ہوگئے اور کہہ دیا کہ ساری زندگی کنوینر نہیں بنوں گا۔ بہادر آباد میں جوابی پریس کانفرنس کرتے ہوئے ڈپٹی کنوینر کنوید نوید جمیل نے کہا کہ الیکشن کمیشن کو لکھے گئے خط پر فاروق ستار کو اعتراض تھا، انہوں نے کچھ بزرگوں کے ذریعے پیغام بھیجا اور اپنی بہادر آباد آمد کو الیکشن کمیشن کو تحریر کیے گئے خط کی واپسی سے مشروط کردیا تھا، ان بزرگوں نے بھی ہمیں قوم اور تنظیم کے اتحاد کے لیے فاروق ستار کی بات ماننے کا مشورہ دیا اسی وجہ سے رابط کمیٹی نے وہ خط واپس لینے کا فیصلہ کرلیا گیا ہے اور ڈپٹی کنوینر ایک بار پھر فاروق ستار کو منانے پی آئی بی جارہے ہیں، ہم کسی صورت ایم کیو ایم کو تقسیم نہیں ہونے دیں گے۔

(جاری ہے)

میڈیا سے بات چیت کرتے ہوئے سینیئر ڈپٹی کنوینر عامر خان نے کہا کہ فاروق ستار اور میرے درمیان لڑائی کا تاثر دیا جارہا ہے اور یہ کہا گیا ہے کہ عامر خان پارٹی پر قبضہ کرنا چاہتے ہیں۔ یہ بات کرتے ہوئے وہ روہانسے ہوگئے اور کہا کہ میں نے کبھی عہدے کی تمنا نہیں کی، میرا احترام اور عزت کارکن ہیں، میرے خلاف جو باتیں کی جارہی ہیں مجھے کوئی فکر نہیں، میں کسی الزام کا کبھی جواب نہیں دوں گا۔

عامر خان نے کہا کہ 22 مئی 2011 کو میں دوبارہ ایم کیو ایم میں شامل ہوا تھا، میرے سامنے شہدا کے اہل خانی سے معافی مانگنے کی شرط رکھی گئی تھی۔ شہدا کے تذکرے پر وہ رونے لگے اور کہا کہ اس سے صرف دو ماہ قبل میرے بیٹے کو قتل کردیا تھا اور 2 ماہ بعد ایم کیو ایم میں شمولیت کا مقصد اسی قتل و غارت کو روکنا تھا، میں چاہتا تھا کہ مہاجروں کے درمیان یہ لڑائی بند ہوجائے۔ اس موقع پر انہوں نے ساری زندگی کنوینر نہ بننے کا بھی اعلان کیا۔ ڈپٹی کنوینر خالد مقبول صدیقی نے بتایا کہ ہم دوبارہ فاروق ستار کو منانے پی آئی بی جائیں گے، اس پارٹی کے لیے ہزاروں نوجوانوں نے زندگیاں قربان کی ہیں اور ہم اسے بکھرنے نہیں دیں گے۔