پولیو ایک موذی وائرس ہے جس کا مکمل خاتمہ انتہائی ضروری ہے‘محمد عمیر

پشاور (اُردو پوائنٹ اخبارتازہ ترین - اے پی پی۔ 25 جولائی2020ء) ڈپٹی کمشنر ڈی آئی خان محمد عمیر نے کہا ہے کہ جہاں ایک طرف حکومتی مشینری کورونا وائرس کیخلاف مصروف عمل ہے وہیں پولیو وائرس کو بھی نظر انداز نہیں کیا جا سکتا‘ پولیو ایک موذی وائرس ہے جس کا مکمل خاتمہ انتہائی ضروری ہے۔ ان خیالات کا اظہار انہوں نے آج اپنے دفتر کے کانفرنس ہال میں انسداد پولیو مہم سے متعلق انتظامات کے جائزہ اجلاس کی صدارت کرتے ہوئے کیا۔

اجلاس میں ایڈیشنل ڈپٹی کمشنر ڈیرہ نور عالم محسود کے علاوہ ڈسٹرکٹ ہیلتھ آفیسر ڈاکٹر عارف محمود، ڈپٹی ڈی ایچ او ڈاکٹر نائیک شیرانی، ای پی آئی کوارڈینیٹرڈاکٹر عرفان عزیز، ایل ایچ ڈبلیو کوارڈینیٹر ڈاکٹر تاج محمد ، ڈاکٹر یوسف، ڈی ایچ سی ایس او تسکین عباس،پولیو ایریڈیکیشن آفیسرز ڈاکٹر نثار، ڈاکٹر جمشید سمیت محکمہ صحت ، تعلیم اور پولیس کے افسران و نمائندوں نے شرکت کی۔

(جاری ہے)

اجلاس کے دوران بریفنگ دیتے ہوئے این سٹاف آفیسر ڈاکٹر حفیظ ا لله نے بتایا کہ اگلے ماہ کی 17تاریخ سے شروع ہونیوالی پانچ روزہ انسداد پولیو مہم کیلئے انتظامات شروع کر دیے گئے ہیں ۔ کورونا وائرس کے حوالے سے احتیاطی تدابیر کو مدنظر رکھتے ہوئے انسداد پولیو ٹیموں کی ٹریننگ کیلئے علیحدہ علیحدہ سیشنز کا انعقاد کیا جائیگا جبکہ ٹیموں کی ٹریننگ عید الاضحی سے قبل مکمل کر لی جائیگی۔

انہوں نے مزید بتایا کہ گزشتہ انسداد پولیو مہم کے دوران 3لاکھ 27ہزار بچوں کو انسداد پولیو کے قطرے پلائے گئے جو کہ مجموعی ہدف کا 96فیصد بنتا ہے۔ اگلے ماہ منعقد کی جانیوالی مہم کے دوران بھی تین لاکھ سے زائد پانچ سال تک کی عمر کے بچوں کو انسداد پولیو کے قطر ے پلوانے کا ہدف مقرر کیا گیا ہے جس کیلئے 351ایریا انچارج اپنے فرائض سرانجام دیں گے۔

اس موقع پر خطاب کرتے ہوئے ڈپٹی کمشنر نے کہا کہ ماہ مئی کے دوران انوائرمنٹل سیمپل سے متعلق زیرو رپورٹ آنا خوش آئند بات ہے لہذا سرویلنس پر مزید توجہ سے کام جاری رکھا جائے۔ وسائل کو بہتر طور پر استعمال کیا جائے۔ انہوں نے ہدایت کی کہ مہم کے دوران وائلز کی ریکوری کیلئے مربوط لائحہ عمل تیار کیا جائے اور اس مقصد کیلئے ایریا کے حساب سے متعلقہ آفیسرز کو ذمہ داریاں سونپی جائیں کیونکہ اس سلسلے میں کوئی کوتاہی برداشت نہیں کی جائیگی اور متعلقہ آفیسر جوابدہ ہو گا۔ انہوں نے محکمہ پولیس کو ہدایت کی کہ پولیو ٹیموں کی سیکورٹی کیلئے فول پروف سیکورٹی پلان تشکیل دیا جائے تاکہ ٹیموں کو فرائض کی بجا آوری میں کسی قسم کی دشواری کا سامنا نہ ہو۔