لاہورچیمبر کے صدر کی سربراہی میں وفد کا بی ایف سی کا دورہ

لاہور (اُردو پوائنٹ اخبارتازہ ترین - آن لائن۔ 30 اپریل2024ء) لاہور چیمبر آف کامرس اینڈ انڈسٹری کے صدر کاشف انور کی سربراہی میں وفد نے بزنس فسیلیٹیشن سنٹر کا دورہ کیا اور کاروباری برادری کی سہولت کے لیے مختلف وفاقی و صوبائی محکموں کے سہولیاتی مراکز کا جائزہ لیا۔ وفد میں لاہور چیمبر آف کامرس اینڈ انڈسٹری کی ایگزیکٹو کمیٹی کے اراکین فریحہ یونس، راجا حسن اختر، احمد الہی ، شمیم اختر، وسیم یوسف، میاں عتیق الرحمن ،سیکریٹری جنرل شاہد خلیل اور دیگر ممبران شامل تھے جبکہ انچارج بی ایف سی عابد سلیم نے لاہور چیمبر آف کامرس اینڈ انڈسٹری کے وفد کو تفصیلی بریفنگ دی۔

بی ایف سی میں 31محکمہ جات ہیں جس میں 26پنجاب جبکہ پانچ وفاق سے تعلق رکھتے ہیں جن میں ای پی ڈی ، ایل ڈی اے، پڈمک، فڈمک، لوکل گورنمنٹ ، پی ایف اے ، ایس این جی پی ایل ، انرجی، لیسکو، پی ایچ ای، پنجاب سمال انڈسٹریز و دیگر شامل ہیں۔

(جاری ہے)

لاہور چیمبر آف کامرس اینڈ انڈسٹری کے صدر کاشف انور نے بزنس فیسیلیٹیشن سنٹرجیسا اہم قدم اٹھانے پر پنجاب حکومت کو خراج تحسین پیش کیا۔

انہوں نے کہا کہ ون ونڈو آپریشن کے تحت صوبائی اور وفاقی محکموں کی خدمات کو ایک ہی چھت کے نیچے یکجا کرنا تاجر برادری کے لیے بہت بڑا ریلیف ہے کیونکہ اس سے ان کے سرمائے اور وقت کی بچت ہوگی۔لاہور چیمبر کے صدر نے پنجاب انڈسٹریز ڈیپارٹمنٹ کی انتھک کوششوں اور تاجر برادری کے بے مثال تعاون کو بھی سراہا۔انہوں نے کہا کہ پنجاب حکومت کی جانب سے ون ونڈو آپریشن کاروباری عمل کو آسان اور صوبے میں کاروباری ماحول کو بہتر بنائے گا۔

انہوں نے کہا کہ انہوں نے کہا کہ کاروباری برادری کو اب مختلف سرکاری اداروں کی خدمات ایک ہی چھت تلے میسر آگئی ہیں۔ کاشف انور نے کہا کہ لاہور اور دیگر چیمبر ز آف کامرس اینڈ انڈسٹری کافی عرصے سے یہ مطالبہ کر رہا تھا کہ مقامی اور غیر ملکی سرمایہ کاروں کی سہولت کے لیے ون ونڈو آپریشن ہونا چاہیے۔انہوں نے کہا کہ پنجاب ون ونڈو آپریشن نہ صرف غیر ملکیوں کی حوصلہ افزائی کرے گا بلکہ مقامی تاجروں کو بھی نئے منصوبوں میں سرمایہ لگانے کی ترغیب دے گا۔

لاہور چیمبر کے صدر نے کہا کہ سٹڈیز سے معلوم ہوا ہے کہ ان ممالک میں رجسٹرڈ کاروبار بڑھ رہے ہیں جہاں ون ونڈو سہولیات قائم ہیں۔کاشف انور نے کہا کہ لاہور چیمبر آف کامرس اینڈ انڈسٹری ملک کا پہلا چیمبر ہے جس نے اپنے ممبران کے لیے ون ونڈو آپریشن شروع کیا ہے اور بہت سے وفاقی اور صوبائی محکمے ایک ہی چھت کے نیچے اپنی خدمات فراہم کر رہے ہیں۔لاہور چیمبر کے صدر کاشف انور نے ہر کاروباری شخص سے بزنس فسیلیٹیشن سنٹرکو وزٹ کرنے کی استدعا کی تاکہ عوام الناس کو ان سہولیات سے آگاہی ہوسکے۔