عدالت میں پیشی سے قبل اسد قیصر کا ہسپتال میں طبی معائنہ

پی ٹی آئی کے خلاف سارا ظلم و جبر نواز شریف اور مسلم لیگ ن کر رہی ہے، اسد قیصر

جمعہ 24 نومبر 2023 14:58

عدالت میں پیشی سے قبل اسد قیصر کا ہسپتال میں طبی معائنہ

چار سدہ(اُردو پوائنٹ اخبارتازہ ترین - این این آئی۔ 24 نومبر2023ء) انسدادِ دہشت گردی عدالت میں پیشی سے پہلے قومی اسمبلی کے سابق اسپیکر اسد قیصر کا ڈی ایچ کیو ہسپتال چارسدہ میں طبی معائنہ کرایا گیا۔ڈاکٹر کے مطابق اسد قیصر کے گلے اور سینے میں معمولی تکلیف ہے۔اس موقع پر اسد قیصر نے کہا کہ انتخابات کے لیے جو ماحول بنایا گیا ہے یہ کسی طور پر بھی فری اینڈ فیئر نہیں، ہم پر سلیکٹڈ کا الزام لگانے والی اپوزیشن خود سلیکٹڈ پلس بن گئی۔

(جاری ہے)

اسد قیصر نے کہا کہ اس ماحول میں اگر انتخابات ہوئے تو کوئی اسے تسلیم نہیں کرے گا، پی ٹی آئی کے خلاف سارا ظلم و جبر نواز شریف اور مسلم لیگ ن کر رہی ہے۔انہوں نے کہا کہ نواز شریف کو وزیرِ اعظم بنانا ہے تو انتخابات کی کوئی ضرورت نہیں، ایسے انتخابات سے بہتر ہے نگراں کی طرح نواز شریف کی وزارتِ عظمیٰ کا نوٹیفکیشن کر دیں۔اسد قیصر نے کہا کہ پی ٹی آئی کے انٹرا پارٹی انتخابات کا معاملہ پارٹی کی لیگل ٹیم دیکھ رہی ہے۔واضح رہے کہ گزشتہ روز سابق اسپیکر قومی اسمبلی اسد قیصر کو چارسدہ پولیس نے دوبارہ گرفتار کر لیا تھا۔اینٹی کرپشن عدالت نے اسد قیصر کی ضمانت پر رہائی کا حکم دیا تھا۔ان پر گجو خان میڈیکل کالج صوابی کے لیے سامان کی خریداری میں خوردبرد کا الزام ہے۔